KRALENDIJK – Boneiru tin un Agènda di Archivo nobo ku ta indiká kon lo manehá, konservá i hasi archivonan mas aksesibel pa pueblo den e añanan benidero. Dia 25 di sèptèmber 2026, Diputado Timoteo Silberie a firma e Agènda di Archivo Boneiru 2026-2030 na Den Haag.
Protehá nos patrimonio Boneriano
Archivo ta konsistí di dokumento i informashon ku nan ta warda pa motibu di nan importansia pa Boneiru. Por pensa riba karta, desishon, akta, mapa, pintura, potrèt i video. Tambe dokumento digital, e-mail i wèpsait por forma parti di archivo. E informashon akí ta nesesario pa trabou di gobièrnu, pa investigashon i pa konservá patrimonio kultural di Boneiru. Entidat Públiko Boneiru a formulá e Agènda di Archivo den kolaborashon ku Ministerio di Enseñansa, Kultura i Siensia (OCW) i Archivo Nashonal.
Plannan te ku 2030
Den e Agènda di Archivo tin e plannan prinsipal pa e añanan benidero:
-
realisá un lugá adekuá pa konservá archivo;
-
digitalisá mas archivo i hasi nan disponibel digitalmente;
-
desaroyá un portal di archivo online;
-
implementá reglanan i prosesonan di trabou kla pa maneho di archivo;
-
sòru pa tin sufisiente personal pa maneho di archivo i duna nan e konosementu nesesario.
E meta ta pa kuida dokumentonan di balor i hasi nan aksesibel pa tur hende. Di e manera akí, nos ta konservá nos pasado i sòru pa generashonnan benidero por keda konektá ku historia di Boneiru.
Klek akí pa lesa e Agènda di Archivo Boneiru 2026-2030 kompletu.