TEXEL – Boneiru, Sint Eustatius (Statia) i Saba, huntu ku e sinku islanan hulandes (Waddeneilanden), ke duna nan bos konhunto mas peso na Den Haag. Esaki tabata e liña korá durante e reunion anual di E8, e ret di ocho isla, ku a tuma lugá dia 1 i 2 di òktober na Texel.
E8 ta konsistí di e tres islanan di Hulanda Karibense, i e islanan di Texel, Vlieland, Terschelling, Ameland i Schiermonnikoog. E koperashon ta sigui riba e deklarashon di intenshon ku a firma na yüni 2025 na Vlieland. Den dje, e ocho islanan a akordá pa traha mas estrechá huntu pa defendé nan interesnan, kompartí konosementu i atendé temanan manera kalidat di bida, aksesibilidat i servisio públiko.
Gezaghèber Alida Francis di Sint Eustatius a bisa ku e islanan ta mira tres tema prinsipal ku nan ke trese dilanti na Den Haag: invershon igual, fortifikashon di kapasidat pa ehersé tarea i hasi e islanan mas resistente kontra konsekuensianan di kambio klimátiko.
Banda di e ocho islanan, representantenan di e provinsianan Noord-Holland i Fryslân, Ministerio di Asuntunan Interno i Relashonnan den Reino (BZK), Vereniging van Nederlandse Gemeenten (VNG) i miembronan di Parlamento Hulandes a partisipá na e reunion.
E kòmbersashonnan a trata diferente retonan ku e islanan tin en komun, apesar di e diferensianan geográfiko grandi entre nan. Entre otro a papia tokante disponibilidat di awa dushi, seguridat di awa, integridat i resistensia atministrativo i e relashon ku otro nivelnan di gobièrnu. E programa na Texel tabata inkluí tambe bishitanan di trabou relashoná ku warda awa dushi i maneho di kosta.
For di plataforma pa koalishon di islanan
Kolehio Ehekutivo di Boneiru a informá Konseho Insular anteriormente ku den e próksimo añanan E8 mester desaroyá paso pa paso den un “koalishon di islanan” struktural, manera ABC Online Media a publiká kaba na ougùstùs.
Esaki por tuma forma di un konvenio òf akuerdo di koperashon, posiblemente sostené pa un entidat hurídiko limitá. Tin tambe ideanan pa desaroyá un strategia koordiná di lobby serka gobièrnu Hulandes i Tweede Kamer, ku un tim di public affairs i un persona fiho di kontakto na BZK.
Te ainda no a hasi públiko si e reunion na Texel a resultá den akuerdonan konkreto tokante e siguiente pasonan pa sigui desaroyá e koperashon.