KRALENDIJK – Redukshon di e preshon di bestia manera kabritu ku ta kome mata por kontribuí konsiderablemente na rekuperashon di e mondinan seku tropikal na Boneiru. Esaki ta sali for di resultadonan di un investigashon di 15 aña, den kua Wageningen University & Research, STINAPA, Echo Foundation i BonBèrdè tabata envolví.
E investigadónan a studia áreanan sera kaminda bestianan no por a drenta, maneho di bestianan den Parke Nashonal Washington Slagbaai i áreanan kaminda a planta miles di mata indígena. E resultadonan ta mustra ku ora preshon di bestianan ku ta kome mata ta baha e kantidat di palunan hóbens ku ta sali naturalmente ta krese konsiderablemente. Spesialmente despues di añanan ku hopi yobida, mas mata hóben a kuminsá krese.
Sinembargo, rekuperashon ta tuma tempu. Na Boneiru a dura te 15 aña promé ku investigadónan a mira un oumento kla den kantidat di palunan jòn mas grandi i palunan adulto. I asta despues di e periodo ei, solamente mas o ménos un terserparti di e sortonan di palu di mondi seku a bolbe di forma natural. Palunan indígena ku a planta den áreanan protehá a sobrebibí bon. Esaki ta indiká ku plantamentu dirigí por komplementá rekuperashon natural. Un ehèmpel visibel ta Proyekto Parke Bunita den Washington Slagbaai: na lugánan kaminda a kita kabritu, vegetashon ta rekuperando i palunan indígena hóben ta haña oportunidat pa krese.
Na otro lugánan den Karibe a mira resultadonan komparabel. Den parke Christoffel na Kòrsou, e kantidat di palma Sabal indígena adulto a subi di 323 na 1979 pa mas ku 1.000 na 2018, despues ku a kita kabritu òf stroba nan di drenta sierto área. Na Saba, kaminda for di 2020 a kita mas ku 90 porshento di bestianan ku tabata kana liber, yerba i mata chikí ta bolbe krese i palunan hóbens ta logra sobrebibí mas tantu.
E balansa korekto
E investigadónan ta enfatisá ku e meta no ta pa eliminá kria di bestia, ku tin un papel kultural i ekonómiko di hopi aña riba e islanan, sino pa prevení ku tin demasiado preshon di bestia den áreanan natural. Vegetashon salú ta yuda tene tera i humedat, ta limitá eroshon i, na mes momento, ta ofresé un hábitat pa bestianan indígena.