KRALENDIJK – Den nos rúbrika ‘Bèk na Boneiru’ nos ta sigui Bonerianonan ku a lanta riba e isla òf tin lasonan fuerte kuné, a traha òf studia den eksterior i despues ta bolbe (bèk). Den e di bintisinku edishon aki nos ta papia ku Cristely Cranston. El a lanta kant’i laman na Boneiru, a bai Rotterdam pa su estudio i tabata sa semper kaba ku e ke bolbe bèk atrobe. Entretantu e ta traha den merkadeo i branding i banda di esei e ta konstruí su propio empresa. “Laman tabata nos lugá di rekreo.”
Cristely a nase i lanta na Boneiru. E ta bini di un famia grandi kompuesto ku shete yu i ta wak bèk ku plaser riba su hubentut. E Boneiru di e tempu ei tabata un otro isla ku awor segun Cristely. “E tempu ei tabata mas trankil.”
E bida tabata tuma lugá pa gran parti pafó. Cristely a kore baiskel hopi, a bai landa i tabata subi laman regularmente ku su famia riba boto. “Laman tabata nos lugá di rekreo.”
No ta na kosta so tabata kaminda pa rekreá. “Pero e saliñana tambe tabata nos lugá di rekreo. E saliñanan seku. Nos tabata bai einan hopi biaha ku nos kuat.” E ta enfatisá ku un sonrisa ku esei tabata otro ku sierto hóben ta hasi awendia riba kaya. “Nos tabata hasié si den e saliñanan. No riba kaminda.”
E sentimentu ku el a keda spesialmente kuné di e periodo ei ta libertat. “Tur hende tabata konosé otro. E sentimentu di libertat e tempu ei tabata enteramente otro.” Komo ku tabatin ménos fasilidat i distraishon, e muchanan mester tabata mas kreativo tambe segun Cristely. “Bo tabata bini ku diferente manera kreativo pa dibertí bo mes. No tabatin muchu kos pa hasi. Bo mester tabata simplemente kreativo ku bo grupo di amigu.”
Si e pensa bèk riba esei e ta emoshon’é. “Mi kurpa ta bisti un tiki ora mi pensa kon tabata ántes. Simplemente un tiki e sentimentu di nostalgia.”
Tur ora un kámara kuné
Despues di su temporada di skol Cristely mester a disidí kiko e kier a sigui studia. E no tabatin un kontesta simpel. “Bon mirá mi no tabata sa kiko mi kier a sigui studia. Bo ta hóben. Bo no sa kon bo ta mira bo mes aki djes aña.
Su mama si a mira su interes hopi promé. “Mi mama a duna mi e push. El a bisa: bo ta kreativo, bo ta bon riba kòmpiuter, bo gusta saka pòtrèt i bo ta kana tur ora ku e kámara.”
E sakamentu di pòtrèt ei a kuminsá tempran. “Mi tabatin semper un Lumix chikitu. Ègt un kámara ros. Mi tabata kana semper kuné.” Segun e mes ta bisa e tabata esun den famia i grupo di amigu ku kontinuamente tabata saka pòtrèt. “Mi tabata e fotógrafo di henter e grupo di amigu òf famia.”
Tin biaha e tabata kohe asta e kámara profeshonal di su tata. “E ora ei mi tabata bai saka pòtrèt ku mi amiganan riba playa. Mi tata tabata rabia tur ora, pasobra ora nos tabata bini bèk e kámara tabata yen di santu.” Finalmente el a skohe pa un estudio di komunikashon na Hogeschool Inholland na Rotterdam.
Rotterdam komo su kas nobo
Hulanda no tabata kompletamente deskonosí. Su wela tabata biba hopi aña na Tilburg i Cristely a bai regularmente ku fakansi einan. “Tilburg tabata nos di dos kas.” Sinembargo e no kier a bai biba einan ora ku el a bai studia. “Mi a pensa semper: mi ke bai Rotterdam, mi ke bai Rotterdam.”
Su ruman hòmbernan tabatin un konekshon ku e siudat ei. Finalmente un parti grandi di e famia tabata biba na diferente momento den e mésun apartamentu. “El a pasa literalmente di e esun mas grandi te esun mas chikitu.” Pero si bo konosé Hulanda komo un pais pa fakansi, e ta resultá algu otro ku biba realmente einan. “Impakto kultural kon ku bo mir’é.”
Kietut den klas
El a ripará un di e promé diferensianan na skol. “Aki na Boneiru bo ta kumindá tur hende. Mi a drenta klas i a bisa bon dia. Tur hende a keda ketu.” Pa Cristely esei tabata straño. “E ora ei mi a pensa: oké, e hendenan aki no ta kumindá.”
Na prinsipio el a purba konsientemente di meskla ku studiantenan Hulandes. “Mi no ke tabata ta tur ora ku hende di Antias so. Mi kier a siña di otro kultura i otro hende tambe. Nan tin otro perspektiva i manera di pensa.”
Pero e no tabata fásil tur ora. Un dia el a puntra un grupo di ko-studiante despues di skol si nan por a bai lùnch huntu. “Nan a keda wak mi literalmente sin kontestá i despues nan a sigui ku nan kòmbersashon.”
For di e momento ei el a disidí di konsentrá su mes riba su mes i su estudio. “Mi a pensa: Mi ta bai skol gewon, hasi mi kos i ta bai atrobe.”
Hulandes a bira un opstákulo grandi
Un otro reto tabata e idioma Hulandes. “Mi tabatin hopi problema ku mi Hulandes.”
Na Boneiru tambe Cristely a haña lès den idioma Hulandes. Pues e no tabata konosí ku studia den un otro idioma ku no ta Hulandes. Na mes momento Hulandes no tabata e idioma ku e tabata papia kontinuamente den bida diario. “Esei no tabata e idioma ku bo ta papia konstantemente.” Spesialmente skirbimentu di relato no tabata fásil tur ora. E kontenido por ta bon segun e, pero ku mas ku sinku fout den skirbimentu por desaprobá un relato.
Tambe el a haña un remarke durante su estudio ku e no a lubidá nunka. “Despues di un presentashon un dosente a bisa mi literalmente: dikon bo ta hasi e estudio aki na Hulandes?” Cristely no a komprondé e pregunta. “Mi a pensa: dikon? I just want to do it. I need to do it. Riba e isla nos no tin esaki.”
Tòg el a perseverá. “Mi tin un meta. Mi meta tabata: mi ta bai Hulanda pa haña un diploma.” E perseveransia ei e ta mira komo un parti importante di su karakter. “Mi no ta entregá fásil.”
Finalmente el a hasi su estudio den sinku aña. E mester a hasi su tésis di nobo i famia a yud’é ku e Hulandes. “Mi tabatin un tio i un tanta. Mi tabatin ègt un tim.” E ta hari ora ku e kòrda bèk. “Nan a bisa: nos a optené e diploma ei huntu ku bo tambe.”
Di fitness pa sirbi serbes na Feyenoord
Despues di su estudio Cristely a deskubrí na Rotterdam un pashon grandi pa fitness. “Na Hulanda mi a bira un fanátiko di gymnastik di bèrdat.” E tabata trein diferente dia pa siman. “Bo ta traha riba bo mes. Hasi deporte tabata un di e kosnan mas importante p’ami. E ta salú, bo por enfoká mihó i bo ta tene bo kurpa i bo mente fet.”
El a disidí di sigui un estudio pa entrenadó di fitness. E promé intento a frakasá. “Mi por a mustra, pero nan tabata ke pa mi splika tur kos stap pa stap.” Einan tambe e idioma a hunga un ròl segun Cristely. “Di dos biaha si mi a logra.”
Den su añanan na Hulanda el a biaha hopi tambe pa deskubrí destinashonnan nobo. Despues ku el a kaba di studia e tabatin diferente djòp temporal. “Mi a traha den kushina na Duinrell.” Tambe el a traha na De Kuip. “Mi a bai traha serka Feyenoord. Den bar, sirbi serbes for di sifon.”
E djòpnan ei tabata nesesario pasobra su derecho riba finansiamentu di estudio a kaduká. “Mi a hasi gewon di tur un poko pa por haña sèn.”
‘Mi kier a bin bèk semper’
Keda biba Hulanda tabata finalmente nunka e plan pa Cristely. “Nò, pasobra semper mi kier a bolbe bèk. Mi kier a bai mi isla bèk semper.” Na prinsipio el a pensa ku podisé e por a haña eksperensia promé na Hulanda. “Pero mi a pensa: riba mi isla tambe mi por hasi esei.”
Algu promé ku terminá su estudio a presentá un posibilidat na Boneiru. El a papia na Hulanda ku e direktor anterior di Ofisina di Turismo Boneiru (TCB). “Mi tabatin un kòmbersashon kuné i un par di dia despues mi a tende: si, bo por bin traha serka nos.
El a kuminsá komo kordinadó di media sosial i desaroyo di produkto. TCB no tabata un organisashon deskonosí p’e. Su mama a traha einan na departamentu di finansas. “Mi a krese einan. Mi a hunga einan komo mucha i tabata konosé un par di kolega.” Cristely tambe tabatin e sentimentu ku un dia e lo kier a traha pa e organisashon turístiko.
Traha na e marka Boneiru
Den TCB su trabou a bai mas i mas den direkshon di branding i merkadeo di kontenido. Rebranding di Boneiru tabata un momento importante pa Boneiru. “Esei tabata un di e mihó periodonan. E tabata un eksperensia kompleto.” Ofisinanan kreativo di entre otro Merka, Hulanda i Korsou a bini Boneiru pa presentá nan ideanan.
Ora Cristely a wak henter e proseso algu a kai na su lugá. “Mi a pensa: mi ta mira mi mes den e área aki.” Su trabounan a kambia seguidamente mas den direkshon di kontenido, branding i merkadeo di kontenido. “E ora ei mi a deskubrí ku esaki ta mi pashon.”
E motivashon su tras p’e ta kla. “Mi ta hasi’é pa e isla, pa mi hendenan. Esei ta dunami e empuhe pa kontinuá.”
Su propio agensia di merkadeo
Banda di su trabou fast Cristely kier a kuminsá semper ku algu di su mes. “For di na Hulanda mi tabata sa ku mi ke mi propio agensia.” E idea a nase durante su tempu di studiante, pero na prinsipio e no tabata riska sigui kompletamente. “Mi tabata hopi insigur.”
Na 2021 el a registrá su empresa, pero despues a keda un tempu relativamente ketu. “Mi a habri e empresa na 2021, pero pa motibu di inseguridat mi a hasi bon mirá nada.” Na 2023 el a disidí di lans’é di bèrdat. Mientrastantu e tin kliente fiho i e ta hasi diferente proyekto. “E ta bai bon, pasobra e ta dunami energia.”
Pa Cristely emprendé ta relashoná spesialmente ku perseverá. “Disiplina i konsistensia. Bo mester keda gewon konsistente. Bo mester aktua, bo mester hasié.”
Laga hóbennan regresá Boneiru
Cristely ta mira na mes momento ku regresá Boneiru no ta bai sin mas pa profeshonalnan hóben. Bibienda ta karu, salarionan no ta haltu tur ora i konstruí un bida independiente por ta kompliká. “E ta bèrdaderamente super difísil.”
E mes a skohe na prinsipio pa invertí spesialmente den su desaroyo. “E salario no tabata wauw, pero si bo sa den kiko bo ke krese, bo mester traha na bo eksperensia.” P’e e periodo ei tabata vinkulá spesialmente ku konosementu, konekshonnan i un ret. “E ora ei bo ta yega na un punto ku bo ta pensa: Now I know my value. Now i know what I can offer.”
Ora puntr’é kiko Boneiru mester hasi pa laga mas Boneriano hóben bin bèk, e ta kontestá rápido. “Hasié atraktivo. Hasié interesante. Hasié sèksi.” Segun e ta trata entre otro di bibienda pagabel i oportunidat pa hóbennan pa nan mes konstruí algu. “Tur kos ta karu aki nan. Podisé p’esei hendenan ta mira ku e ta limitá. Pero bo por krese aki sigur, tanten bo mes ke i traha duru p’e.”
‘E isla mester di hendenan hóben’
Cristely mes ke keda parti di dje. “E isla mester di hendenan hóben. Young professionals ku tin e empuhé pa yuda e isla.”
E ta konta su mes enfátikamente den e grupo ei. “Mi ta sigur ún di e personanan ei. Mi ke yuda sigur den diferente proyekto ora por.” E ta pas den henter e liña ku ta kore den su storia. Di un hubentut kaminda laman i saliñanan tabata su lugá di rekreo, via un periodo di estudio kaminda e mester a siña perseverá, te un karera kaminda e ta purba di promové Boneiru i e mes ta krea posibilidatnan nobo.
Hulanda a dun’é independensia, eksperensia i perspektivanan nobo. Pero e kaminda ku e kier a usa e eksperensia tabata semper predestiná. “Mi kier a bai bèk mi isla semper.”