KRALENDIJK – Koperativa Piskabon a kuminsá djamars 22 di sèptèmber ku un seri di tayer pa piskadó i representantenan di koperativa. E programa ta dura seis dia, repartí riba dos siman, ku seshonnan di tres ora pa dia.
E promé anochi tabata dediká na e funshonamentu di koperativanan. Raymond Gericho i Rudney Monte a splika kiko afiliashon na un koperativa ta enserá, ku atenshon spesial pa e derechonan i debernan di miembronan. Segun Piskabon, tin nesesidat di mas konosementu riba e tema akí pa fortalesé e organisashonnan ku ta traha na benefisio di nan miembronan.
Pòtret: Piskabon
Piskabon ke traha pa un plataforma kolektivo di koperativismo na Boneiru, den kua organisashonnan por sostené otro i kolaborá. Bonaire Platinum tabata entre e organisashonnan presente na e anochi informativo, representá pa Sherwin Pourier i Egbert Janga. Piskabon ta indiká ku lo sigui elaborá e idea di un plataforma konhunto.
E otro seshonnan lo enfoká riba formashon i desaroyo di piskadó i merkadeo. Pa kontribuí na e programa, a invitá entre otro STINAPA, Toezicht en Handhaving, Servisio Veterinario, LVV, RDI i Krus Kòrá.
Sosten di gobièrnu
Piskabon a organisá un programa similar aña pasá. E tayer aktual ta risibí sosten di gobièrnu di Boneiru i ta forma parti di e tareanan di informashon, preparashon i edukashon di miembronan ku ta stipulá den e akuerdo entre gobièrnu i e kooperativa.