KRALENDIJK— AFBW, den kolaborashon ku Centrum voor Formatie (CENFOR) i Federacion di Trahadornan di Aruba (FTA), a organisá un kurso sindikal titulá “Habilidatnan básiko pa shopsteward i negosiashon”. E kurso a tuma lugá dia 22, 23 i 24 di sèptèmber, ku partisipashon di 45 persona.
Durante e tres dianan, kas sindikal tabata bon yená ku partisipantenan ku a bin fortalesé nan konosementu i abilidat pa trabou sindikal. Tambe diferente miembro di direktiva i di konseho di konseho tabata presente, huntu ku presidente di ABV, señora Gina Maduro.
Señornan Hubert Dirksz, Tyrone Bremo i Ryan Giel a duna e kurso, ku sosten di presidente di FTA, señor Hose Figaroa.
E programa tabata konsistí di kuater parti: kiko ta un sindikato, e responsabilidatnan di un shopsteward, análisis di realidat i téknikanan di negosiashon. E temanan aki ta forma un base pa representantenan sindikal por defendé interesnan di trahadónan i prepará nan mes pa negosiashon.
Segun AFBW, kada miembro ta importante, sin importá su funshon den e organisashon. Tant’un miembro, shopsteward, miembro di direktiva komo un konsehero tin un papel den éksito di e sindikato. P’esei, e organisashon ta pone énfasis riba sigui siña, kapas itá su miembronan, kompartí konosementu i apliká den práktika loke nan a siña.
Ku e kurso aki, AFBW ta sigui traha na kontinuidat i stabilidat di e organisashonnan sindikal AFBW i USIBO.
AFBW a bisa di ta gradisí tur esnan ku a partisipá i ta indiká ku lo sigui organisá e tipo di kursonan aki den futuro.