Outonan chines ta konkistando merkado di Boneiru den tempu rèkert

KRALENDIJK – Te ku algun aña atras na Boneiru tabatin un sierto deskonfiansa ainda pa loke ta trata outonan chines. Nan tabata mas barata ku e markanan haponés, koreano, merikano i europeo ya konosí, pero na mes momentu tabatin pregunta tokante kalidat, konfiabilidat, piesanan i e balor ku e outo lo konservá despues di algun aña. Entretantu e panorama riba kaya ta kambiando rápidamente. Un parti kada bes mas grandi di e outonan nobo ku ta kore na Boneiru ta di fabrikashon chines, miéntras ku e kantidat di marka ‘chino’ for di kua konsumidónan por skohe a krese konsiderablemente den apenas algun aña.

Outonan chines no ta kompletamente nobo na Boneiru. Akkermans Auto Supplies ta bende BYD pa mas ku dies aña kaba. Den komienso tabata trata di un fabrikante relativamente deskonosí pafó di China. Entretantu BYD a krese bira unu di e produktornan mas grandi di outonan eléktriko na mundu, i e marka tin awor su mes showroom den e kompleho di Akkermans.

Loke sí ta nobo ta prinsipalmente e rapides ku kua e merkado ta desaroyando. Banda di BYD, awor ta ofresé markanan manera Changan, Chery, Great Wall, Haval, Geely, GAC, JAC i BAIC. Nòmbernan mas nobo manera Deepal i Avatr tambe a subi merkado den último lunanan aki. Kaminda te algun aña pasá e eskoho di outonan chines tabata ainda limitá, awor e oferta ta kubri kasi tur e segmentonan importante, for di SUV mas chikí i outonan elektriko te crossover luhoso i pikòp di dòbel kabina.

Avanse rápido

Tin diferente splikashon pa e avanse rápido aki. Probablemente e preis ta esun di mas importante. Outonan di e markanan establesé a bira konsiderablemente mas karu den e último añanan. Pa un outo nobo haponés òf koreano den e segmento mediano òf un SUV, na Boneiru rápidamente ta papia di 30.000 – 40.000 dòler i mas. Pa un pikòp dòbel kabina di un marka haponés òf merikano konosí, e preis por subi te den direkshon di 50.000 pa 60.000 dòler.

Ora kompará e oferta serka e dilernan na Boneiru, ta resultá ku e alternativanan chines hopi biaha ta por lo ménos 30 porshento mas barata. Den algun kaso e diferensia ta aserká kasi mitar di e preis. Na kompra di un pikòp manera Changan Hunter ‘ful ekipá), por ehèmpel, por spar vários miles i tin biaha te dies miles di dòler solamente riba e preis di kompra kompará ku un modelo similar di Toyota òf Ford.

E diferensia den preis lo tabata ménos remarkabel si e outonan chines lo tabata mas simpel òf ku ménos kosnan modèrno. Pero ta presisamente riba e tereno ei hopi a kambia den e último añanan aki. Hopi -pa nos bisa kasi tur- modelo ta bini ku touchscreen grandi, dashboard digital, sensor pa stashoná, kámera di 360 grado, sistema pa karga telefon sin waya i diferente sistema elektróniko pa asistí e chofer. Ekiponan ku serka marka haponés òf hopi biaha ta eksigí un pakete mas kartu, regularmente ta bini den e pakete básiko di e outonan marka den chines.

Esaki ta nifiká ku fabrikantenan chines no ta kompetí solamente riba preis mas. Nan ta purba di ofresé pa un suma konsiderablemente mas abou por lo ménos mes tantu, i hopi biaha mas ekipashon. E persepshon di kalidat tambe a kambia. Fabrikantenan chines a traha durante hopi aña huntu ku fabrikantenan di outo haponés, merikano i europeo i asina a akumulá hopi konosementu. Entretantu empresanan chines mes a bira hungadónan importante riba tereno di bateria, propulshon elektriko i elektrónika pa outo.

Periodo di garantia hopi mas largu

Un di dos faktor importante ta e garantia. Periodonan di garantia di sinku aña ya no ta nada eksepshonal mas pa outonan chines na Boneiru. Serka algun marka esaki ta subi te na shete òf ocho aña. E outonan di marka Chery, ku resientemente a hasi su entrada na Boneiru, ta ofresé asta dies aña di garantia riba mayoria di su modelonan.

Otro faktor ku ta hunga un ròl ku mas i mas diler di outo ya establesé a kuminsá bende marka chines awor. Akkermans ta kombiná BYD i Chery ku, entre otro, Ford i Hyundai. AutoCity ta bende banda di Suzuki i Mitsubishi tambe e markanan chines GAC, JAC i BAIC. Star Motors ta representá markanan chines manera Great Wall, Haval, MG, Maxus i Geely.

Dabboussi Motors ta un dealer relativamente nobo, pero den poko tempu a logra forma un oferta hopi amplio ku Changan, for di SUV te pikòp. Ku Deepal i Avatr e kompania a agregá modelonan eléktriko den un segmento relativamente haltu.

Dabboussi Motors ta un dealer relativamente nobo, pero den poko tempu a logra forma un oferta hopi amplio ku Changan, for di SUV te pick-up. Ku Deepal i Avatr e kompania a agregá modelonan eléktriko den un segmento relativamente haltu.

Pa e konsumidó Boneriano esaki ta nifiká un eskoho kompletamente diferente kompará ku algun aña pasá. Ya no ta trata di un outo Haponés òf Merikano konosí kontra un alternativa Chines barata di un representante deskonosí. Den nan showroom tin outonan ku ta kompetí direktamente ku otro den grandura, nivel i pakete kompleto kaminda e diferensia den preis por ta konsiderabel.

Disponibilidat di piesa

E desaroyo na Boneiru ta forma parti di tendensianan mundial. China a bira e eksportadó di outo mas grandi na mundu. Spesialmente na Amérika Latina markanan chines ta ganando tereno rápidamente. Na Chile, por ehèmpel, aktualmente kada un den tres outo ku ta wòrdu bendí ta di fabrikashon chines. Na Panama, e marka Geely tabata na na aña 2025 tabata e di kuater marka mas bendí, kaminda e markannan Jetour i Changan tambe a logra yega den e top dies. Asta na Hulanda, kaminda markanan chines ainda tin un parti hopi mas chikí di merkado, nan benta ta krese rápidamente.

Boneiru ta parse di ta sigui e desaroyo internashonal aki na un ritmo aselerá. Esaki no ta nifiká ku no tin ningun rason pa duda. Markanan haponés pa mas ku 50 aña ta mustrando ku nan ta traha bon na Boneiru i ta rentené un porsentahe hopi haltu di nan balor, ora ta bendenan despues di algun aña. Di hopi di e modelonan chines ainda nos no sa kon bon nan lo sa di mantené na balor despues di dies òf diesinku aña.

Boneiru ta parse di ta sigui e desaroyo internashonal aki na un ritmo aselerá. Esaki no ta nifiká ku no tin ningun rason pa duda. Markanan Haponés pa mas ku 50 aña ta mustrando ku nan ta traha bon na Boneiru i ta rentené un porsentahe hopi haltu di nan balor, ora ta bendenan despues di algun aña. Di hopi di e modelonan Chines ainda nos no sa kon bon nan lo sa di mantené na balor despues di dies òf diesinku aña.

Pero apesar di esaki, tin un realidat hopi kla pa e kumpradó di un auto chines. Esun ku na momento di kumpra ta paga vários miles òf asta dies miles di dòler ménos. Kumprando un outo mas barata tambe ta nifiká ku mester fia ménos sèn i paga ménos na interes riba fiansa. Un balor di kompra mas abou tambe por hasi un diferensia konsiderabel pa loke ta trata e prima anual di seguro. Na mes momento e kumpradó hopi biaha ta haña un pakete mas kompleto, i un garantia muchu mas largu ku esun di hopi marka mas konosí.

Mirando tur esakinan, e avanse rápido di outonan chines na Boneiru kisas ta ménos sorprendente ku loke parse na promé bista. E reputashon ku markanan haponés, koreano, merikano i europeo a konstruí durante den dékadanan ta sigui ta un bentaha importante. Pero fabrikantenan chines ta pone kontra esaki un kombinashon di preis, nivel di pakete i garantia largu ku pa kada bes mas konsumidó ta difísil di ignorá.

Mirando tur esakinan, e avanse rápido di outonan Chines na Boneiru kisas ta ménos sorprendente ku loke parse na promé bista. E reputashon ku markanan Haponés, Koreano, Merikano i Europeo a konstruí durante den dékadanan ta sigui ta un bentaha importante. Pero fabrikantenan Chines ta pone kontra esaki un kombinashon di preis, nivel di pakete i garantia largu ku pa kada bes mas konsumidó ta difísil di ignorá.

I esei awor no ta solamente visibel den e showroomnan na Boneiru, sino prinsipalmente riba kaya.