ORANJESTAD – Polis na Aruba a sera djarason anochi kamindanan pa kompañá un ambulans ku un beibi resien nasí mas lihé ku ta posibel pa hospital. E beibi a nase na kas i segun e promé informashon no tabata reakshoná.
Den kareda di 18.58 sentral di polis a haña e petishon pa bai ku urgensia máksimo un kas na Caya Frère Fredericus. Na yegada e personal di ambulans a pidi polis pa hasi e ruta pa hòspital liber.
Bou di kordinashon di sentral di polis diferente unidat di polis a sera e kamindanan, di moda ku e ambulans por a sigui kore seif i mas lihé ku ta posibel. A hiba tantu e beibi komo e mama hòspital pa kuido médiko adishonal.
No a divulgá nada di nan situashon aktual.