KRALENDIJK- Riba 6 di September, Dia di Boneiru, James Finies lo lansa ofisialmente Partido Pueblo Progresivo (PPP), presentando loke e ta desribí komo un vishon nobo pa Boneiru, basá riba integridat, liderazgo kompetente i sirbi I pone e pueblo di Boneiru promé.
Segun Finies, e lansamentu di PPP ta mas ku solamente introdukshon di un otro partido polítiko, e ta di pueblo pa pueblo. E ta e kuminsamentu di un moveshon dediká na atendé e luchanan I desafionan ku pueblo komun di Boneiru ta enfrentá tur dia.
“Pa dékadanan, Boneiru a keda goberná pa hopi di e mesun figuranan polítiko bou di diferente nomber di partido. Tur e partidonan aktual ta sali for di e mesun grupo di lidernan resiklá. UPB a sali for di Partido Demokrát, MPB a sali for di UPB, i formashonnan polítiko mas resien manera M21 i e partido nobo di Nina Den Heyer tambe a sali for di MPB, mientras ku Partido Santana a sali for di PHU”, asina Finies a bisa.
Segun Finies, esaki ta nada otro ku loke ta deskribí komo un resiklahe e mesun liderazgo polítiko, no un kambio berdadero.
“Boneiru mester di otro tipo di liderazgo, liderazgo basá riba integridat, eksperensia profeshonal, bon maneho i konosementu finansiero komprobá”, asina Finies a bisa den un deklarashon pa prensa djamars anochi.
Durante e lansamentu ofisial por spera tambe prersentashon e Manifesto preliminar di PPP, den kual lo presentá propuestanan práktiko pa atendé e retonan mas grandi pa Boneiru, manera kosto di bida haltu, falta di kas, preis di koriente i varios otro punto mas.
Polítika mester sirbi pueblo
Finalmente Finies a remarká ku polítika mester ta pa sirbi pueblo, no pa mantene poder. “Si bo ta kere ku Boneiru meresé mihó, meresé un liderazgo honesto, solushonnan práktiko i un gobièrnu ku ta traha pa su pueblo, e ora ei riba 6 di September, nos e pueblo, huntu, lo kuminsá un kapítulo nobo den historia di Boneiru."