KRALENDIJK – Anterior diputado Joselito Statia a reakshoná den un deklarashon ámplio riba e krítika ku a surgi último simannan tokante institushon di e Komishon Desaroyo Espasial i Asuntunan di tereno (CROG). Segun Statia institushon di e komishon tabata kompletamente legítimo i esaki a kai dentro di kompetensianan di e Kolegio Ehekutivo.
Riba 29 di yüni 2026 Statia a pone su funshon komo diputado abou. For di e dia ei diferente splikashon ta sirkulá di motibu di su partida. Originalmente tabata papia di insufisiente komunikashon ku koalishon, mientras despues a menshoná institushon di CROG komo motibu. Segun e èks-dipitado e splikashonnan aki ta kontradiktorio.
Den su deklarashon Statia ta plantia ku e diskushon rondó di CROG ta drei rònt di diferensia entre toma di desishon polítiko i ehekushon atministrativo. Segun Statia Lei entidatnan públiko Bonaire, Sint-Eustatius i Saba (WOLBES) ta disidí ku Kolegio Ehekutivo ta outorisá pa instituí komishonnan. Pa esei no tin mester di aprobashon previo di koalishon òf Konseho Insular segun Statia.
Statia ta enfatisá ku e komishon tin solamente un ròl konsultivo. CROG lo no tin outoridat atministrativo independiente, lo no por tuma desishonnan obligatorio i lo no por komprometé Entidat Públiko Boneiru finansieramente. Segun Statia e komishon ta instituí debí na falta di personal temporal na Direktorado di Desaroyo Espasial i e kantidat grandi di failnan kompliká, entre kua proyektonan di konstrukshon ku tin basta tempu drumí kaba.
Tambe e ta reakshoná riba krítika tokante posibel kontrato di enkargo (OvO). Segun Statia e komishon mes no por sera kontrato òf asigná presupuesto. E tarifanan máksimo ku a menshoná den e desishon di institushon segun Statia ta destiná solamente komo limitashon finansiero pa den kaso ku eksperensia eksterno ta nesesario.
Mas aleu Statia ta mustra ku komparashon di tarifanan pa ora di profeshonalnan eksterno ku salario di ámtenarnan segun e no ta duna un bista hustu, pasobra un tarifa eksterno ta inkluí tambe gastunan manera seguro, penshun i alohamentu.