KRALENDIJK – Fundashon Alzheimer Bonaire (FAB) a sera su programa di Luna Mundial di Alzheimer ku vários aktividat enfoká riba konsientisashon, konekshon i sosten pa personanan ku demensia i nan famia.
Djabièrnè anochi FAB a organisá un anochi informativo na Captain Don’s Habitat. Invitado tabata Lisette Does, inisiadó i gerente di Love Elderly Daycare Center na Aruba. El a papia tokante e balor di pasadia den un ambiente liber i na eskala chikí. Love Elderly ta risibí un máksimo di 15 kliente pa dia, prinsipalmente personanan den fase inisial di demensia òf Alzheimer, ku asina por haña guia mas personal.
Durante su estadia na Bonaire, Does tambe a bishitá diferente pasadia pa mira kon guia di personanan ku demensia ta organisá lokalmente.
Djasabra FAB a organisá un dia spesial pa bishitantenan di Villa Henna na DIMI DIBO Ranch di famia La Croes. Bou di e tema ‘Sembrando amor i kosechando konekshon’, nan a pasa e dia huntu ku habitantenan di Kas Hóben ku Futuro di Fundashon Rosa di Sharon. E aktividat tabata bou di guia di Henna Winklaar, anterior casemanager di demensia, ku sosten di Claire Vriens di Ergo Pa Bo.
Djadumingu mainta Luna Mundial di Alzheimer a sera ku e tradishonal kaminata di konsientisashon di 5 kilometer, organisá pa Intensity i Eagle Eye Media den kolaborashon ku FAB. E ruta a kuminsá na waf di Cargill Salt Company i a bai te kasnan di katibu i bèk.
E kaminata a tuma lug pa di sinku biaha. Partisipantenan a paga 10 dòler, ku e entrada destiná pa e programa di konsientisashon di FAB. Segun e fundashon, e kantidat di partisipante e aña aki a surpasá esun di añanan anterior.
FAB a gradisí su boluntarionan, sostenedónan, partnernan i públiko pa nan aporte na e aktividatnan durante Luna Mundial di Alzheimer.