KRALENDIJK - Hospice Kas Flamboyan ta organisá e siman aki atrobe un entrenamentu speshal pa su boluntarionan, den kolaborashon ku “VPTZ(Vrijwilligers Palliatieve Terminale Zorg) Nederland”
Entrenadó Ruth Elenbaas ta na Boneiru pa sostené e boluntarionan mas aleu den nan trabou balioso den kuido paliativo. Kasi 30 boluntario ta partisipá na e entrenamentu.
Nan ta partí den dos grupo i kada grupo ta sigui dos parti di dia di entrenamentu. Asina, konsientemente, nan ta pone tempu liber disponibel, banda di nan propio trabou i e turnonan ku nan ta hasi den hospice, pa sigui siña i sigui desaroyá nan mes.
“Nos hospice por eksistí danki na e dedikashon di nos boluntarionan,” direktor Danny Rojerta bisa . “Nan ta duna nan tempu, atenshon i embolbimiento na nos habitantenan i nan sernan kerí. Ku nos por ofresé nan tambe e posibilidat pa siña huntu i sigui desaroyá nan mes ta hopi balioso.
E entrenamentu di e ana aki ta trata di duna i risibi “feedback”. Dor di reflehá huntu riba e práktika di tur dia, boluntarionan ta siña kompronde otro, e habitantenan i nan sernan kerimas mihó, nan ta fortalesé otro i ta presentá ku ainda mas atenshon pa e habitantenan.
“Dor di praktiká huntu kon pa duna i risibi “feedback”, nos ta siña tambe kon pa traha mas miho huntu. Na final esaki ta yuda nos pa “nos ta presente” ainda miho pa nos habitantentan i nan sernan keri,” asina kordinadónan Angelo Goeloe i Mimi Dongen ta indiká.
Ruth Elenbaas, entrenadó na “ VPTZ Nederland” , ta enbolbí pa di kuater biaha den un entrenamentu na Boneiru.
“ Ta bunita pa atrobe mira un ekipo asina fuerte i konektá. Nos ta gradisí ku nos por inkluítambe e boluntarionan di Kas Flamboyan den e entrenamentunan ku ta ofresé tambe na Hulanda. Asina nos ta sigui siña huntu i traha huntu pa mehorá e kalidat di kuido paliativo”.
E kolaborashon ku “VPTZ Nederland” ta duna Hospice Kas Flamboyan e posibilidat pa trese konosimentu, eksperensha i desaroyonan for di Hulanda pa Boneiru.
Desde 2022, hospice Kas Flamboyan ta miembro di “VPTZ Nederland”. E gran kantidat di boluntario ku a partisipá ta mustra kon enbolbí nan ta ku e hospice i ku e kuido pa habitantenan i nan sernan keri.
Banda di nan dedikashon di tur dia, atrobe nan ta traha espasio pa siña, komparti eksperenshanan i fortalesé otro.
“Ta presente” ta forma un base importante den esaki: ta presente ku atenshon, serka i ku kompashon pa hende den nan fase vulnerable i speshal di nan bida. Dor di sigui invertí den e boluntarionan,Hospice Kas Flamboyan ta sigui traha na e kalidat di kuido i un tim di personanan ku ta sostené i fortalesé otro.