KRALENDIJK– Den e último sinku aña, no ménos ku 43 kuenta anual di kompanianan supsidario di Bonaire Holding Maatschappij N.V. (BHM) a keda prepará. Di esakinan, ya 36 a keda aprobá pa akshonista.
E trabou ta parti di un proseso pa eliminá e retraso ku tabatin den rendishon finansiero di e kompanianan públiko. Na Selibon N.V. a kontrolá e kuentanan di 2016 te ku 2025, di kua ocho a keda aprobá. Tur kuenta kontrolá di Bonaire Overheidsgebouwen N.V. (BOG) di e mesun periodo a keda aprobá.
Na BonLab N.V. a aprobá kuater di sinku kuenta kontrolá, na Tourism Corporation Bonaire (TCB) ocho di nuebe i na Telbo N.V. kuater di shete.
Ora direktiva di BHM a keda nombrá na 2020, eliminashon di e retraso den kuentanan anual tabata un di e tareanan ku a keda poné na su enkargo. Direktor Adely Susana-Jansen ta indiká ku kuentanan aktual i kontrolá ta nesesario pa e akshonista por evaluá situashon finansiero, invershonnan, risikonan i maneho di un kompania.
Segun BHM, ainda tin kuentanan ku mester pasa pa e proseduranan nesesario promé ku nan por keda aprobá formalmente. E holding ta bisa ku e ta sigui traha ku e kompanianan pa eliminá e retraso restante i logra ku rendishon finansiero tuma lugá na tempu.