KRALENDIJK – E presupuesto di supsidio pa deporte na Boneiru a oumentá hopi e último añanan. Esei por mira den un resúmen di Indebon di e periodo 2023 te ku 2026.
Na 2023 tabatin USD 208.331 disponibel pa supsidio di deporte. E montante ei a subi te USD 283.331 na 2024 i seguidamente pa USD 483.331 na tantu 2025 komo 2026. Ku esaki e presupuesto disponibel a bira mas ku dòbel den tres aña di tempu.
E kantidat di deporte i organisashon ku ta hasi un apelashon pa supsidio ta grandi. Na 2023 tabatin 20 deporte òf organisashon, kompará ku 30 na 2025 i 28 na 2026. Petishonnan ta bini entre otro di mundu di futbòl, beisbòl, landamentu, atletik, wentsùrf, baskelbòl, tènis, rugby i yudo. Deportenan mas chikitu ku ta kresiendo tambe ta hasi uso di e posibilidatnan.
INDEBON ta enfatisá ku mester parti e plaka disponibel den diferente organisashon i metanan deportivo. P’esei un petishon pa supsidio no ta nifiká ku ta otorgá outomátikamente e montante kompleto ku a pidi.
Segun INDEBON meta di e supsidionan ta pa yuda organisashonnan deportivo ehekutá aktividatnan i sigui desaroyá nan deporte. E organisashon ta papia di un uso ámplio i diferente di e medionan disponibel dentro di sektor deportivo Boneriano.