KRALENDIJK - Dòkter di kas penshoná Esther Bernabela, konosí pa hopi hende na Boneiru komo ‘doktora’ a uni su mes na e filanan di Movementu di Pueblo Boneriano (MPB). E partido blou a anunsiá esaki djadumingu mainta riba su medionan sosial.
Bernabela a hunga un ròl importante durante hopi aña komo miembro prominente di Union Patriótiko Boneriano (UPB), pa kua e tabata sinta den konseho insular, entre otro durante e koalishon di MPB i UPB.
Opservadónan na e isla ta papia di un desaroyo interesante i relevante. Den pasado tabata notabel ku lider di partido di MPB, Elvis Tjin Asjoe, i Bernabela por a traha huntu di forma produktivo riba hopi dosye.
Despues ku e notisia a sali por mira un diskushon animá riba medionan sosial, ámbos di hende ku a aploudí e paso di Bernabela, komo di esnan ku tabata ménos positivo. Un polítiko aktivo di oposishon a kalifiká e paso di Bernabela den un kòmbersashon ku ABC Online media komo un "teremoto polítiko".
"For di e elekshonnan pasá mi no tabata sinti mi bonbiní mas den UPB, ounke mi a dediká hopi aña na e partido ei. Mi tabata tin mi momentu di diskushonnan tambe ku MPB den pasado, pero nan final di dia nos por a traha bon ku otro”, asina Bernabela a bisa djadumingu mainta den kòmberashon ku Awor.nu.
Bernabela a agregá ku for di chikí e tabata tin amistat ku Tjin Asjoe i su famia. "Ademas, ounke no tur hende sa esaki, tata di Hennyson Thielman ta mi aktuprimu. Tur esakinan ta pone mi sinti bon”, e anterior dòkter di kas a agregá.
Bèk riba e senario polítiko
Ku su djòinmentu di MPB, Bernabela a regresá di gòlpi riba e senario políktiko di Boneiru. Despues di kuater aña di ousensia for di polítika aktivo. E paso di Bernabela ta interesante den e situashon polítiko di Boneiru, ku a mustra su mes hopi volátil i turbulento den e último lunanan aki.