ORANJESTAD - Dutch Caribbean Islandhopper (DCI) djaweps a risibí notifikashon ofishal ku nan tin mag di realisá buelonan entre F.D. Roosevelt Airport na Sint-Eustatius i e aeropuerto L’Espérance na e parti frances di Sint-Maarten. E ruta nobo lo kuminsá probablemente na mitar di e luna di yüni.
E konekshon nobo ta wòrdu mira komo un desaroyo signifikativo pa e konektividat di St. Eustatius ku otro islanan, manera St. Maarten. Direktor di DCI, Steven Chin-A-Kwie, ta hopi kontentu ku e desaroyo akí.
"Nos ta masha felis ku e autorisashon akí i e ta pas perfektamente den nos plannan," segun Chin-A-Kwie a bisa.
Varios buelo pa dia
DCI no ke solamente ofresé buelonan mainta trempan òf atardi lat, pero ta spera di ehekutá varios buelo pa dia entre e dos islanan. Den futuro serkano, e kompania aéreo ta spera di pone avionnan mas grandi den servisio tambe. E buelonan pa St. Martin ta e promé fase di un ekspanshon mas ámplio, inkluyendo servisio di karga.
No un luho, pero un nesesidat
Chin-A-Kwie ta suprayá ku aviashon regional pa hopi habitantenan di e islanan no ta un luho, sino un nesesidat, pa sitan médiko, aktividatnan di negoshi òf akseso na produktonan i servisionan esenshall. Ounke ku e kompania no ta risibiendo supsidio, nan ke ofresé pasashi na preis hopi mas abou ku ta e kaso aktualmente.
E autorisashon ku DCI tin di parti di EASA komo Third Country Operator ta konfirmá ku DCI ta kumpli ku e normonan internashonal di seguridat i operashon di e komunikdat europeo, un kondishon obligatorio pa buelonan komersial den área di komunidat europeo, di cual St. Martin ta forma parti di dje.