KRALENDIJK- Segun e bosero di partido UPB, Boneiru mester hasi mas pa loke ta trata seiguridat di kuminda. Segun Craane, e ta sostené pensamentu di e koalisahon aktual, pa loke ta dunamentu di prioridat na esaki.
“Mi ta sostené e posishon aki totalmente i ta kla pa yuda ku akshonnan konkreto. Seguridat di kuminda ta garantisá ku Boneiru mes, minimalmente, por sòru pa 50% di su nesesidat di kuminda. Aktualmente nos ta kore hopi atras pa logra e meta aki”, asina Craane a bisa.
Segun Craane, akshonnan konkreto lo mester enserá entre otro privatisashon inmediato di LVV. “LVV komo instituto pará riba su mes pia por traha hopi mas efektivo pa logra e meta ariba deskribí”.
Craane ta di opinion tambe ku aktualmente Boneiru ta wardando muchu riba Hulanda. “Nos mester tuma inisiativanan mas konkreto pa organisá nos mes mihó den loke ta trata seguridat di kuminda. Di e forma aki, si nos tin un base profeshonal fuerte, e ayudo di gobièrnu sentral di Hulanda lo bira muchu mas efektivo”, asina Craane a bisa. .
Base finansiero sólido
Tambe e eksponente di UPB ta bisa di ta boga pa krea un base finansiero sólido i struktural pa LVV nobo. Segun Craane esaki ta posibel, por ehèmpel, si nos hasi uso di entradanan struktural di industria di turismo, por ehèmpel reservando un parti di e entrada di Visitor Entry Tax pa esaki.