KRALENDIJK – A detené djarason kuater turista despues di un bringamentu kaminda a maltratá un agente polisial na sivil. E insidente a tuma lugá riba Kaya L.S. (Goi) Coffi, na altura di ofisina di Duana.
Polis a risibí 28 di mei alrededor di 7.45 di anochi un yamada di un bringamentu entre diferente persona na e sitio. Na yegada di e patruyanan e agentenan a topa esnan embolbí na e lugá konserní, entre nan un kolega ku tabata traha na sivil.
Vários sospecho
Ta sospechá e kuater sospechosonan di violensia públikamente, resistensia na momento di detenshon, no sigui órden di polis, menasa i maltrato. Un di nan asta a kometé destrukshon na un vehíkulo polisial.
Ta trata di tres hende muhé di 23, 21 i 25 aña i un hende hòmber di 31 aña. Tur ta turista.
Ta sigui investigá e kaso.