KRALENDIJK – Bonairiaanse Wegenbouw Maatschappij (BWM) a dal un stap nobo na kaminda pa mantenshon mas duradero di kamindanan na Boneiru. Pa promé biaha ta bai apliká asfalt pa un proyekto pa un kliente kaminda a prosesá 20 porshento di asfalt resiklá. Segun direktor Martijn Zwiers esei no ta produsí ganashi solamente pa medio ambiente, pero ta pèrkurá tambe pa un ekonomisashon di gastu di mas o ménos 5 porshento.
Djaweps 28 di mei un grupo di representante di vários kompania Boneriano a haña un rekorido serka BWM. E bishitantenan a haña un bista tras di kortina na e sentral di asfalt na Santa Clara i a bishitá tambe un proyekto banda di stadion di bala na Rincon, kaminda ta bai apliká e meskla di asfalt nobo. Representantenan di diferente partidonan polítiko tambe tabata presente.
Ta traha e asfalt nobo den e fábrika na Santa Clara. (Potrèt: Hans Hofstra )
Proyekto nobo
Segun Zwiers ta promé biaha ku ta bai usa e método nobo realmente pa un kliente. “Nos a hasi prueba kaba ku esaki anteriormente i a poné na terenonan pa tèst, pero esaki ta promé biaha ku nos ta aplik’é pa un proyekto pa un kliente,” el a konta durante e rekorido. “Ku esaki nos ta tambe esun promé ku ta usa e téknika aki riba islanan ABC.” Koleganan di BWM di Kòrsou tambe tabata presente pa mira kon ta apliká e asfalt nobo na Boneiru.
Ku mashinnan grandi ta basha e asfalt.
(Potrèt: Hans Hofstra )
E asfalt resiklá ta prosedente di kamindanan eksistente ku ta kibra òf fres. Ta prosesá e material aki den asfalt nobo, di manera ku mester importá ménos material básiko nobo. Na e momento aki e meskla ta konsistí di 20 porshento di asfalt resiklá, pero segun Zwiers porsentahenan mas haltu ta faktíbel den futuro. Mundialmente ta apliká e téknika aki hopi kaba, spesialmente den Europa i Nort-Amérika.
Tékniko di laboratorio Jason Benito ta konta di e midimentunan ku nan ta apliká. (Potrèt: Hans Hofstra )
Gastunan di produkshon ta baha
Banda di e ganashi di durabilidat e inovashon ta produsí tambe un bentaha finansiero. Komo ku mester kumpra ménos material nobo den eksterior, e gastunan di produkshon ta baha. “Riba e produkto asfalt nos tin un redukshon di gastu di mas o ménos 5 porshento. Nos por ofresé nos klientenan e bentaha aki tambe,” segun Zwiers.
Den e laboratorio di BWM e bishitantenan a haña splikashon di Jason Benito tambe, ku a mustra kon ta kontrolá e kalidat di e asfalt kontinuamente. Tumando muestranan regularmente i efektuá midimentu, ta garantisá ku e asfalt ta kumpli ku e kondishonnan indiká promé ku us’é riba kaminda.