KRALENDIJK - James Kroon, miembro di Konseho Insular pa UPB, ta akusá èks-diputado Clark Abraham ku el a paralisá e aparato gubernamental di Boneiru. Motibu ta un dekreto insular di 2023 kaminda Abraham a traspasá kompetensianan drástiko na sekretario di Entidat Públiko.
James Kroon a publiká e dekreto djamars via un komunikado di prensa, akompañá pa dokumentonan atministrativo original. Segun Kroon e dekreto aki ta un di e kousanan mas importante tras di e stagnashon ku e isla a eksperensiá e último añanan.
Kompetensianan suspendé
E dekreto insular, fechá 1 di dezèmber 2023 i publiká den Proklamashon ofisial di Boneiru komo número 24, a duna e sekretario di Entidat Públiko i direktor general mandato, poder i apoderashon pa un seri ámplio di tarea gubernamental. E anekso huntu ku e dekreto ta kontené desenas di kompetensia riba tereno di kompra i destaho, asuntunan di personal, pèrmit-, supsidionan i supervishon. Ku e mésun dekreto e anterior mandato di 27 di ougùstùs 2021 a kaduká.
"Pianan a kibra"
Ku esaki Kroon ta indiká ku Abraham "a kibra pia di tur direktor di e aparato." Segun e konsehal proyekto- i petishonnan na gobièrnu a kega pegá i habitante- i organisashonnan a keda atras ku preguntanan sin kontesta.
"A hasi partikularmente promesanan, pero kontesta- i solushonnan a keda afó,” segun Kroon den su komunikado di prensa.
Reakshon di Clark Abraham
Den kuadro di skucha e otro banda a duna Clark Abraham e oportunidat pa reakshoná. El a laga sa ku e ta bini ku un reakshon, pero na momento di publikashon esaki no a yega na mesa di redakshon di Bonaire.nu ainda.
Yamada na aktual gobernashon
Segun Kroon e koalishon aktual ta hasiendo un inventarisashon di e kousanan tras di e stagnashon gubernamental. E ta hasi un yamada riba e kolegio ehekutivo aktual pa apliká e reformashonnan nesesario ku energia, di moda ku habitante- i organisashonnan por konta atrobe riba kontestanan na tempu i un bon komunikashon.