WILLEMSTAD – Merka ta uzando e Cooperative Security Location , e CSL, na Kòrsou pa e operashon di ayudo despues di e teremotunan grave na Venezuela. E konsuladonan Merikano na Willemstad ta informá ku e Southern Command, SOUTHCOM, ta mobilisando rekursonan via Kòrsou pa ayudo humanitario i maneho di desaster.
SOUTHCOM ta sostené un operashon di ayudo bou liderasho di e Ministerio di Asuntonan Exterior Merikano. E gobièrnu interino di Venezuela a pidi formalmente pa ayudo Merikano. Jeneral-mayor Kevin Jarrard a yega Caracas pa kordiná e akshon.
E ayudo Merikano ta konsistí di 150 miyon dóler. Di esei, 50 miyon dóler ta bai, entre otro, na e Programa Mundial di Kuminda i International Medical Corps. Otro 100 mion dóler lo bai na un fondo di emergensia konhunto di Nashonnan Uní. Washington ta manda tambe un ekipo di desaster ku dos unidat spesialisá di buskamentu i reskate for di Fairfax County na Virginia i Los Angeles.
Boeing V-22 Osprey
(Pòtret: Larry Every )
E forsa militar Merikano ta brinda prinsipalmente transporte i logístika. SOUTHCOM ta usa avionnan di hala fiho i helikòpternan pa trese personal, ekiponan di reskate, materiál i ayudo di emergensia na zonanan afektá. E avionnan ta wòrdu uzá tambe pa inspekshon di daño i pa sostené operashonnan di buskamentu.
Avion militar Mericano aktivo
Diabièrnè tabata aktivo un avion militar Merikano riba Kòrsou. Skrinshòt di Flightradar24 ta mustra VORTEX31, un Bell-Boeing MV-22B Osprey di e United States Marine Corps ku number di registrashon 168643.
E avion tabata visibel na 19.51 or tempu di Kòrsou, na 5.475 pie di haltura i ku un velosidat di tera di 228 nudo. Un segundo skrinshòt ta mustra e mesun Osprey mitar ora despues, 20.21 or, dilanti di kosta di Venezuela serka di Catia La Mar i Maiquetía, serkania di Caracas. E avion tabata bula na 5.025 pie di altura.
E MV-22B ta un avion di rotor inklinabel ku komo avion por kubri distanshanan grandi rápidamente, pero tambe por lanta beli i aterisá komo un helikòpter. E tipo ta wòrdu uzá pa transporte rápido di personal, materiál i provishonnan na lugánan difísil pa alkansá.
Ki hende, merkansia of artíkulonan di ayudo VORTEX31 tabatin abordo i na unda e avion a aterisa eksaktamente, no a wòrdu anunsá ofisilmente.