KRALENDIJK – E komunidat Venezolano na Boneiru ta kontinuá su akshon di yudansa pa e víktimanan di e temblor na Venezuela. Despues di un akshon benéfiko bon bishitá ku benta di arepa djadumingu anochi ta sigui djaluna anochi un akshon di rekoudashon nobo. Di 5’or di atardi te 10’or di anochi habitantenan por entregá nan produktonan na un kònteiner na entrada di stadion.
Segun e promotor Venezolano Anyela Cely e interes pa e akshon benéfiko a surpasá tur espektativa. “Pa 6’or tur kos tabata bendé, mientras hendenan tabata sigui bini pa kumpra arepa. Niun hende a ferwagt esei. El a yena nos kurason.”
Ta usa e sèn ku a rekoudá di e benta pa kumpra remedi i otro ayudo humanitario nesesario pa e zonanan afektá na Venezuela.
Sosten for di tur skina di Boneiru
Cely ta gradisí un i tur ku a sostené e akshon. “Tabatin Venezolano, Boneriano, Colombiano, Dominikano, Yu di Kòrsou, Hulandes, personanan di asina tantu diferente nashonalidat ku a bini huntu pa ún meta: yuda Venezuela.”
Pasobra hopi bishitante tabata ke arepa, e organisadónan ta pensa pa organisáun di dos edishon di akshon benéfiko.
Akshon di rekoudá nobo
Djaluna 29 di yüni ta kontinuá ku e akshon ku un kònteiner pa rekoudá na entrada di e stadion di atletismo na Kralendijk. E empresario Don Andrés a pone e kònteiner disponibel. “Don Andrés a fasilitá nos un konteiner pa risibí e donashonnan. Djaluna nos t’ei di 5’or te 8’or.”
E boluntarionan ta pidi di nobo pa duna spesialmente remedi i produktonan médiko, pero otro produkto ku por usa tambe ta bonbiní.
Yamada na komunidat
Kada donashon, pa chikitu ku e por ta, por hasi un diferensia pa famianan ku a sufri daño di e temblor segun e organisadónan. “Un danki na un i tur ku a demostrá ku ainda tin asina tantu bon hende. Mil danki.”
Lo transportá e produktonan ku a rekoudá pa Venezuela huntu ku e ayudo humantario ku a rekoudá anteriormente.