WILLEMSTAD – E tim di reskate CURSAR a saka dos ohochi di shete luna bibu for di bou di ruina di un edifisio ku a basha aden. A enkontrá mayornan di e beibinan morto. A entregá e muchanan na servisio di ambulans i a transportá nan pa un hospital.
Miembro di CURSAR Jullmar Koeiman ta konta ora el a regresá Kòrsou tokante e reskate i e sirkumstansianan bou di kua e tim mester a traha. P’e tabata e promé biaha ku el a bai traha den un área kaminda tabatin un temblor. “Mi no a mira algu asina nunka ainda. Tabata hopi duru. Mi no tin palabra pa esaki.”
E tim Kurasoleño di ocho persona a biaha ku un avion Merikano algun dia despues di e teribel temblor pa Venezuela. Na nan yegada a hiba nan Caracas kaminda nan a keda na kuminsamentu serka un tim di reskate Venezolano, pa despues nan bai La Guaira kaminda a traha un kampo kompleto ku tènt i baño. For di einan e boluntarionan tabata bai tur dia kaminda e edifisionan a basha aden.
Edifisionan a basha aden kompletamente
E situashon ku e tim a topa na La Guaira a hasi hopi impreshon riba Koeiman. “Tur kos tabata plat,” e ta bisa. “E situashon tabata hopi, hopi teribel.” Segun Koeiman nan tabata saka tur dia ocho pa djes víktima for di bou di e ruinanan. No ta konosí si esei tabata trabou di su tim òf di tur tim di reskate den e área.
Tabata kordiná e akshonnan di búskeda for di un punto sentral di komando. Einan polis lokal, brantwer i servisionan di reskate tabata konsultá huntu riba informashonnan nobo i partisipashon di diferente tim. A repartí e trahadónan di reskate Kurasoleño den diferente grupo huntu ku boluntarionan Venezolano i internashonal. Segun Koeiman nan tabata traha entre otro ku trahadónan di reskate Merikano i Franses. Tabata apuntá un tim pa kada edifisio pa buska sobrebibiente- i víktimanan.
Ohochi mei mei di mayornan morto
Den un di e gruponan tabatin un miembro femenino di CURSAR. E por a penetrá den e edifisio ku a basha’den via un buraku masha smal. Einan el a topa un mama, un tata i nan ohochinan di shete luna.
Ámbos mayor tabata morto, pero e dos beibinan tabata na bida ainda. E trahadó di reskate Kurasoleño a trese e beibinan pafó i a entregá nan na e servisio di ambulans lokal. Seguidamente a transportá nan pa hospital. No a revelá nada di nan situashon ni tampoko unda nan ta keda.
Koeiman mes no a haña sobrebibiente durante su akshon di búskeda. Spesialmente e magnitut di e destrukshon a keda grabá den su mente. Durante e trabou tabatin apénas tempu pa para ketu na e akontesimentunan. E trahadónan di reskate tabata konsentrá riba e órden ku nan tabata haña di e punto sentral di komando.
Post-kuido na momentu di regreso
Despues di regresá Kòrsou mester wak kon e miembronan di tim ta superá nan eksperensianan. Koeiman ta bisa ku via su edukashon den kuido i un stazje anterior na un funeraria e ta kustumbrá ku konfrontashon ku morto. Esei no nesesariamente mester konta pa kada miembro di e tim.
P’esei a palabrá ku gobièrnu di Kòrsou ku e trahadónan di reskate ku mester di sosten sikológiko por akudí na Ayudo pa víktima. Segun Koeiman por buska kontakto pa esei via promé minister.
Tur e miembronan di CURSAR mientrastantu ta seif bèk na Kòrsou. E mishon no a brinda solamente un kontribushon dirèkt na asistensia internashonal, pero a konfrontá e tim tambe pa promé biaha di aserka ku e konsekuensianan di un disaster di temblor masivo.