CARACAS – Na Venezuela tres persona a muri despues ku nan a kontaminá ku e hantavírus. Segun ministerio Venezolano di Salubridat públiko no tin indikashon ku e vírus a pasa di persona pa persona.
E ministerio no a publiká unda a determiná e kontaminashon na Venezuela i di kua variante di hantavírus ta papia. Generalmente djakanan ta plama hantavírus i por okashoná kehonan di pulmon serio serka hende.
Un brote di e variante di Andes a pèrkurá na aprel pa inkietut internashonal. A konstatá e vírus e tempu ei bou di personanan na bordo di e krusero Hulandes m/v Hondius. Tres persona a muri.
E barku krusero a bishitá entre otro Argentina, kaminda tin un espesie di djaka ku por transmití e vírus. E variante di Andes ta distinguí su mes di otro hantavírus pasobra den kasonan eksepshonal por pasa e vírus aki di persona pa persona.
Despues di e brote a repatriá e personanan na bordo na Tenerife. Despues investigashon di fuente i kontakto a tuma lugá i esnan konserní mester a bai den karantena.
E Organisashon Mundial di Salubridat WHO a deklará na komienso di yüli ku e brote pa loke ta trata Hondius ta bou di kontrol. Aktualmente no tin indikashon ku e tres kasonan di morto na Venezuela tin relashon ku e brote anterior.
Kòrsou i Aruba
Aktualmente no tin indikashon ku e por plama pa islanan Aruba, Boneiru of Kòrsou. No a saka un atvertensia ofisial pa e islanan.
Ta konsehá personanan ku resientemente tabata den e área konserní na Venezuela i despues a haña keintura, doló di múskulo, doló di kabes, tosamente of rosea kòrtiku, pa buska ayudo médiko i menshoná nan historia di biaha.