WILLEMSTAD - – Miss International Curaçao ta orguyoso di anunciá e koronashon di Samiah Booi komo Miss International Curaçao 2026. Samiah lo tin e honor di representá Curaçao na e prestihioso kompetensia Miss International, ku lo tuma lugá den luna di novèmber aki naTokyo, Hapón.
E seremonia elegante di koronashon a reuní invitadonan distinguí, sostenedónan, sponsor nan i miembronan di komunidat pa selebrá e momentu importante aki. Durante e anochi, invitadonan a disfrutá di un seremonia elegante, simpel, pero hopi significativo, ku a reflehá di un manera bunita e balornan i e spiritu di e organisashon Miss International.
E evento a inkluí palabranan inspiradó di e Licensee i National Director, Marilse Statie, kende a kompartí e vishon i mision di Miss International Curaçao i a ekspresá su konfiansa den e abilidat di Samiah pa representá nos isla ku grasia, inteligensia i orguyo riba e escenario internashonal.
Un di e momentunan mas speshal di e anochi tabata e discurso emoshonante di Samiah Booi, den kua e la kompartí su biahe pa yega na e korona i a ekspresá su profundo gratitut pa e oportunidat di representá Curaçao na Miss International 2026 na Tokyo, Hapón. Su discurso a pone enfoke riba propósito, kresementu personal, involukrashon den komunidat i su kompromiso di sirbi komo un embahadó orguyoso di Curaçao riba e escenario internashonal.
Presentashon di violín
Invitadonan tambe a disfrutá di un bunita presentashon di violín pa e violinista renombrá Clari Montero, kua su presentashon a agregá un tokante di elegansia i sofistikashon na e festividatnan di e anochi.
Miss International Curaçao ta ekstendé su mas sincero agradisimentu na tur sponsornan i aliadonan ku a kontribuí na hasi e koronashon un gran éxito. Un agradisimentu speshal ta bai na Minister di Enseñansa, Siensia, Kultura i Deporte Sr. S. Van Heydoorn, Nestor Zavarce, Franceen Denbow, Avila Beach Hotel, CHATA, Richard Isa i Contemporaneous pa nan sosten kontinuo i kompromiso ku empoderashon di hóbennan muhé i promoshon di Curaçao riba nivel internashonal.
Tokyo
Awor ku e preparashonnan pa Tokyo ta kontinua, e organisashon Miss International Curaçao tin pleno konfiansa ku Samiah Booi lo sirbi komo un embahadó ekselente pa Curaçao, demonstrando e kalor humano, kultura i spiritu úniko di nos isla durante su partisipashon huntu ku delegadonan di tur skina di mundu.
Nos ta deseá Samiah hopi éxito den su biahe pa Hapón i nos ta spera ku entusiasmo pa sigui sostené dj’e ora ku e ta representá Curaçao ku orguyo riba e escenario mundial, 25 di November 2026.