WILLEMSTAD – Servisio di Impuesto no por paga ainda mas ku tres mion florin ku mester paga bèk di impuesto, pasobra mas ku 2.500 number di kuenta di kontribuyente no ta konosí. E habitantenan konserní a risibí un mensahe den nan buzon di mensahe digital.
Ta trata di restitushon di impuesto riba entrada i primanan sosial ku ta kla pa paga. Pero Servisio di Impuesto por depositá e sèn numa despues ku a registrá e number di kuenta di e kontribuyente den e sistema.
A informá e kontribuyentenan konserní via e-mail riba un mensahe nobo den nan buzon di mensahe di e portal di deklarashon di impuesto online. Eiden tin pará ku falta nan informashonnan di banko.
Agregá number di kuenta via profil di kliente
Fisko ta hasi un yamada na e personanan aki pa agregá un number di kuenta na nan profil di kliente mas lihé ku ta posibel. Pareu ku a registrá e number di kuenta, ta paga e resitushon ku ta kla pa paga kaba.
Tin un averahe di 1.200 florin kla pa kontribuyentenan, ounke e montante por vária pa persona.