KRALENDIJK – STINAPA ta selebrá su di 40 aniversario djadumingu 31 di mei 2026 ku un evento di naturalesa i kultura grátis, esta DANKI. DANKI ta para pa: Dia pa Apresiá Naturalesa, Kultura i Idioma. E evento ta di 09:00 or di mainta pa 12 or di mèrdia na entrada di Washington Park. Organisashon kultural FUHIKUBO i Akademia Papiamentu ta organisá parti di e programa di mainta. Vários organisashon di naturalesa lo tei ku nan mes stènt ku material. Tera Barra y STINAPA ta regalá mata grátis durante DANKI.
"Naturalmente nos ta masha kontentu i orguyoso ku STINAPA tin 40 aña ta boga pa preservashon di nos naturalesa na Boneiru. Naturalesa i kultura ta un. Ta p’esei nos ta selebrá no solamente naturalesa bunita di Boneiru pero tambe kultura di e isla. Den poko palabra, nos ta selebrá tur loke ta hasi dushi Boneiru asina spesial i bunita, ku entre otro muzik di Formashon Musikal Krioyo, FMK,”asina direktor Melissa van Hoorn a deklará.
FUHIKUBO ta tene na museo di Washingtonpark un eksposishon chikí di buki históriko i buki moderno na papiamentu. Akademia Papiamentu tin un stènt ku material di e organisashon, entre nan e dikshonario ‘Papiamentu pika.’ Bishitante di DANKI por partisipá na ‘Reta Papiamentu,’ un wega pa tèst konosementu di papiamentu na un forma prèt.
Riba programa tin tambe un presentashon di Spoken Word di talento nobo i talento konosí. Músiko i kantante hóben i talentoso di Formashon Musikal Krioyo, FMK ta toka. Tone & Texture, e duo nobo di kitarista Lucy y kantante Shanty, ta presentá un repertorio variá. Skol di baile SBAP ta duna sho di ‘Colours of Bonaire.’ Tambe tin aktividat spesial pa mucha.
Tin mas aktividat planiá pa e aña akí den kuadro di e aniversario di 40 aña. Por ehèmpel, un trail run den Washington Park dia 23 di ougùstùs. Delaster kuartal lo tene un simposio ku eksperto boneriano i eksperto for di eksterior.