KRALENDIJK – Entidat Públiko di Boneiru no ta trahando solamente na remodelashon di sentro di Kralendijk, pero ta buska tambe solushon pa e preshon di parker kresiente i e fluho di tráfiko oumentando riba e isla. Segun e direktor di Espasio i Desaroyo Ligwino (Gino) Leito ta tumando tantu medidanan riba término korto komo término largu pa esei.
Durante e trabounan den Kaya Grandi a krea mientrastantu espasio di parker èkstra riba e tereno di e anterior kazèrne Brion. A elevá i egalisá e tereno i ta bai marka e tereno, di moda ku por usa e espasio mas efisiente.
"Nos a yena e parti ku tabata di tera bon i a hasié pareu. Einan tambe nos ta bai marka e tereno, di manera ku por us’é na un manera efisiente komo sitio pa parker. Durante e proyektonan di konstrukshon i despues por sigui us’é gewon,” Leito ta bisa.
Ta traha tambe na e otro banda di e sentro na un struktura mihó di e espasio públiko. Durante remodelashon di Kaya Prinses Marie ta organisá e sitionan di parker di nobo.
"Awor no tin distinshon entre kantu di kaminda i lugá di parker, tur kos ta kana den otro. Nos ta bai organisá esei. Ta posibel ku nos ta haña un òf dos luga èkstra di parker aserka, ta bai organis’é mihó si,” segun Leito.
Espasio limitá
Segun e direktor parkermentu ta keda un punto importante di atenshon. Na mes momento e posibilidatnan pa krea tereno grandi di parker nobo ta limitá.
"E tin nos atenshon, pasobra lugánan di parker ta asina limitá. Gobièrnu tin asina tiki parsela den sentro di siudat ku bo por desaroyá,” e ta bisa. Ta investigando sí unda por realisá den futuro fasilidatnan di parker adishonal.
Rutanan alternativo
Fuera di solushonnan pa parker Entidat Públiko tin atenshon tambe pa aksesibilidat riba e isla riba término largu. Den e presupuesto di mas aña te 2032 a inkluí ku lo asfaltá hopi kaminda di tera.
"Nos tin nos presupuesto di mas aña te 2032. A base di esaki ta bai asfaltá hopi kaminda di tera. Ku esaki nos ta krea mas ruta alternativo pa bai di punto A pa punto B. E ora ei bo no mester kore tur ora via e mésun kaya prinsipal,” Leito ta konta.
Segun Leito esei mester kondusí finalmente pa un sirkulashon di tráfiko, sigur awor ku Boneiru ta sigui krese.
Un sentro ku mihó kalidat di bida
E kalidat di e espasio públiko tambe ta haña atenshon. Ta krea mas zona bèrdè, lus di kaya i fasilidatnan pa hende na pia na e proyektonan ku ta andando.
"E ta un kombinashon di diferente faseta ku nos ta inkluí den e proyekto aki pa drecha e kalidat di bida mas pa e hende,” Leito ta bisa. E kayanan nobo ta bira tambe mas aksesibel pa personanan ku ta ménos movibel. “E no ta solamente pa personanan den un ròlstul, pero tambe pa un persona ku ta kana ku un krùk. E mester bira mas fásil pa tur hende.”