KRALENDIJK – Den 2026 Entidat Públiko Boneiru ta haña e oportunidad atrobe pa hasi petishon di un kontribushon di reino pa proyektonan di tráfiko. E minister Hulandes di Infrastruktura i Obranan Públiko ta pone un supsidio èkstra disponibel pa esaki, despues ku a kda sin usa un parti di e presupuesto disponibel di 2025.
Durante e fase èkstra di petishon aki Boneiru por pidi máksimal 500.000 euro pa medidanan ku ta mehorá seguridat di tráfiko. Ta repartí e presupuesto disponibel segun sekuensia di entrada. Si riba e dia ku a yega e plafòn di supsidio entregá diferente petishon, ta bai tira lòt pa wak kua proyekto mas por bini na remarke ainda pa supsidio.
E areglo ta dirigí riba medidanan di tráfiko ku por ehekutá rápido i ta finalisá pa mas tardá fin di 2028. Pa Boneiru entre otro invershon den iluminashon públiko, medidanan pa frena tráfiko, lugánan di krusa kaya mas seif i otro intervenshon infrastruktural ku ta mehorá seguridat di tráfiko ta bini na remarke pa supsidio.
Ku e fase èkstra di supsidio e ministerio ke usa e presupuesto ku a sobra ainda pa seguridat den tráfiko kompletamente. Boneiru ta pertenesé huntu ku Sint Eustatius i Saba na e entidatnan públiko ku por entregá un petishon.