ORANJESTAD – Aruba lo haña un konekshon nobo ku Canada e temporada di invierno aki. Porter Airlines ta kuminsá pa fin di aña ku buelo direkto entre Aruba i e suidatnan Kanadiense Toronto i Ottawa.
E informashon aki a wòrdu kompartí pa Aruba Airport Authority i Aruba Tourism Authority (ATA) den un komunikado di prensa konhunto. Segun ámbos organisashon, e rutanan nobo lo agregá aproksimadamente 924 asiento èkstra pa siman entre Aruba i Canada durante e temporada di invierno.
E aerolínea lo opera sinku buelo pa siman entre Toronto i Aruba, i dos buelo pa siman entre Ottawa i Aruba. E buelonan lo ser ehekutá ku avionnan Embraer E195-E2.
Segun gerensha di aeropuerto AAA, e ruta nobo ta ofresé mas posibilidat di biaha direkto pa Arubanonan i ta redusí e nesesidat di buelo ku eskala pa yega Canada. Toronto tambe ta funkshona komo un hùp internashonal importante den Nort-Amérika.
Organisashon di turismo ATA ta karakterisá Canada komo un merkado importante pa Aruba. Segun ATA, turistanan Kanadiense ta keda mas largu riba e isla, i nan ta kontribuí mas na e ekonomia lokal. E organisashon ta suprayá ku e konekshon nobo lo yuda pa diversifiká e merkadonan turistiko eksistente i pa atraé mas turista di ‘balon haltu’.
Porter Airlines ta presentá su mes na Canada komo un aerolínea regional premium. Pasaheronan ta risibí wifi gratis, snèk i e kabina tin un diseño sin stul mei mei.