KRALENDIJK - Bonaire mester invertí e añanan benidero fuertemente pa protehá su mes kontra konsekuensianan di kambio di klima. Esei ta sali na kla despues di un investigashon nobo di Grant Thornton Impact House riba enkargo di Greenpeace. Segun e eksplorashon mester di entre 1,2 i 1,8 miar di dòler pa medidanan kontra entre otro kalor, inundashonnan, sekura i pèrdida di biodiversidat.
Ta ofresé e rapòrt djamars 12 di mei na promé minister Rob Jetten durante su bishita na Boneiru. E investigadónan ta spera di por hala atenshon ku esaki pa e posishon delikado di e isla i e nesesidat pa invershonnan struktural for di Den Haag.
Segun e investigashon Boneiru ta sumamente vulnerable pa kambio di klima. Subida di nivel di awa di laman, kalor ekstremo i blikiamentu di koral no ta forma solamente un menasa pa kultura i naturalesa, pero tambe pa ekonomia di e isla, ku ta hopi dependiente di turismo i peskeria.
E parti di gastu mas grandi ta kon ta bai atendé ku molèster di awa, pa kua mester di segun kalkulashon maksimal 810 mion dòler. Medidanan kontra strès di kalor i pa siguridat na kosta ta rekerí shen miones di dòler na invershon. Al respekto ta trata entre otro di hasi áreanan den siudat mas bèrdè, rekuperashon di palunan di mangel i refnan di koral, mihó desagwe i protekshon di zonanan kostal vulnerabel.
Segun e rapòrt e gastunan di no hasi nada finalmente ta muchu mas haltu. Sin medidanan rápido di klima e daño na Boneiru por alkansá na 2050 te mas ku 5 miar dòler. P’esei e investigadónan ta enfatisá ku invershonnan rápido no ta solamente nesesario, pero ta ekonómikamente akonsehabel tambe
Lesa aki e rapòrt kompleto di Grant Thornton Impact House