HEI , ABO TRAHADÓ, BO KONOSÉ BO DERECHO ? Parti 1.
Lokalmente, nos ta trahando duru pa mehorá kòntròl, pa un par dunadó di trabou di “mala fe” no por kita òf marginá e derechonan di e empleado. Ta hopi importante i nesesario pa invertí den e empleadonan pa hasi nan aun mas fuerte i resiliente. Konosé bo derechonan.
Esaki ta e mensahe kla i raspá di parti di gezaghèber John Soliano riba DIA DI LABOR i ku beneplásito sindikalismo na Boneiru ta tuma e mensahe aki komo tópiko di e kolumna semanal tokante sindikalismo na Boneiru. Derechonan di trahadó ta hopi importante. Pero kiko esaki ta nifiká en realidat. Derechonan di trahadó ta regla- i leinan ku ta perkurá ku trahadó ta haña un trato honesto na boka di trabou. Pues e derechonan t’ei pa protehá e trahadó di moda ku nan por ehersé nan trabou den un ambiente honesto, sigur i saludabel i ku nan ta risibí un salario hustu.
Awor lo bo puntra bo mes pakiko gezaghèber i naturalmente nos den sindikalismo ta preokupá pa loke ta pasa ku trahadónan riba Boneiru sigur na man di dunadónan di trabou di mala fe manera gezaghèber mes a trese dilanti. Awèl ata aki algun punto pa bo mes komo trahadó por analisá i konkluí ku si nan ta tuma lugá na boka di bo trabou òf na boka di trabou di otro ku bo konosé.
No bai soño, lanta ariba i kontestá pa bo mes e siguiente puntonan
Bo ta sinti ku bo ta protehá kontra abuso i eksplotashon na bo trabou. Ta trata abo komo trahadó igual ku bo otro kompañeronan, bo tin un entrada husto pa bo por hiba un bida digno pa bo mes i pa ku bo famia?
Bo ta traha den un ambiente sigur i ku no ta pone bo mes òf bo kompañeronan innesariamente na peliger i ku por afektá bo salú tantu mental komo físiko. Ta respetá abo komo hende i ta protehá pa bo no traha den ambiente di peliger pa bo salú i/o bida.
Bo ta haña sufisiente tempu di sosiego. Esaki ta importante pa tin un balansa entre bo bida privá i trabou. Ta den tempu di sosiego bo ta rekuperá bo energia físiko i mental pa bo por sigui hasi bo trabou bon motivá. Kòrda ku nos a kaba di konmemorá DIA DI LABOR 1 di mei, kual ta e dia ku trahadónan a lanta i para e abuso di traha 16 ora pa dia i a eksigí un repartishon husto di e dia den 8 ora di trabou, 8 ora pa bida privá i 8 ora pa sosiego. Derechonan di trahadó ta perkurá ku ta trata tur trahadó igual sin importá nan género, edat, rasa o religion. Deskriminashon riba flur di trabou ta prohibí. E ta un derecho ankrá den nos konstitushon i rekonosé pa tratadonan internashonal. Nan ta riba nos leinan nashonal i ta konta direktamente pa abo komo trahadó. Den sindikalismo nos a bin konstatá ku ora ta trata di derechonan di trahadó kontinuamente tin algun fayo ku ta kometé. Pa awe ata algun fayo pa abo komo trahadó paga tinu riba nan. Hopi trahadó no ta na altura di nan derechonan. Hopi biaha nos ta tuma nota ku trahadónan no konosé nan derechonan i pa tal rason nan no por sali pa defendé esakinan. Nan ta firma o bai di akuerdo ku kontraktnan kontra derechonan ku ta ankra den lei i reglanan. Nan ta bai di akuerdo ku palabrashonnan a base di konfiansa i no ta pone e palabrashonnan aki por eskrito. Ora ku na boka di trabou violá e derechonan di abo komo trahadó, ta importante pa bo tuma akshon, entre otro papia ku bo dunadó di trabou, buska konseho hurídiko òf tuma kontakto ku bo sindikato.
Pregunta ku abo tin ku kontesta sinsero awe, bo konosé bo derechonan ku nos a deskribí awe, bo ta miembro di un sindikato? Kiko bo ta warda.. pasa na Kas Sindikal na Kaya Korona i inskrbí awe mes komo miembro. Kòrda riba e dicho di bieunan; UN HÒMBER ADVERTÍ TA KONTA PA DOS.
.