ORANJESTAD - Kompania di aviashon Bestfly a desidí di entregá su Air Operator Certificate (AOC) na Aruba. Ku esaki, ta parse ku tambe e plannan anteriormente anunsiá pa un servisio regular entre Aruba, Bonaire i Korsou ta yega na un fin prematuro.
E kompania a konfirmá den un deklarashon ku despues di un periodo di evaluashon, a desidí di stòp ku su plantan pa operá for di Aruba.
E disishon ta bin ménos ku un aña despues ku a bira konosí ku Bestfly tabata trahando riba un konekshon regional entre e islanan ABC. Pa esakinan e kompania lo tabata tin plan pa bin ku avionnan di tipo ATR, pa ehekutá buelo den region.
Na e momentonan ei, e inisiativa tabata wòrdu mirá komo un posibel fortalesimentu di e konektividat regional.
Segun abogado di aviashon i kolumnista Lincoln D. Gomez, Bestfly na Aruba ya tabatatin un base operashonal, personal lokal i eksperensia ku avionnan regional manera e Embraer E190 i ATR 72-600.
E sosten deseá no a konkretisá
Bestfly anteriormente a indiká ku tabata spera sosten di e gobièrnu di Aruba pa e desaroyo mas aleu di e aktividatnan di bula regional. Sin embargo, e sostenido ei ta parse di a keda hopi limitá.
Ku e entrega di su permit operational, ta parse ku e kapitulo di un posibel linea di Bestfly den e region Karibense ta keda será pa awor. Pa e momentu aki ainda no ta kla si e kompania tin intenshon pa sigui aktivo di un òf otro manera den e region aki.