WILLEMSTAD – TUI ta ampliá e kantidat di buelo pa Kòrsou ku dos buelo èkstra pa siman e wenter benidero. Ku esaki e tour operator ta respondé na e demanda konstante pa fakansi riba e isla i ta informá ku e buelonan pa Kòrsou a alkansá un grado di okupashon di 100 porsiento.
Ku e ampliashon e kantidat total di buelo semanal di TUI pa islanan ABC ta oumentá pa dieseis den e temporada di wenter. Ta efektuá e dos buelonan èkstra dirèkt pa Kòrsou riba djaluna i djaweps i ta produsí mas ku 27.000 stul èkstra.
Segun Antoin Klein Hofmeijer, Hefe di TUI Dutch Caribbean, spesialmente Kòrsou ta mustra un desaroyo di merkado eksepshonalmente fuerte. E ampliashon mester respondé na e demanda kresiente i na mes momento ofresé mas fleksibilidat di TUI.
Boeing 787 ku personal di kabina lokal
E tour operator ta mira tambe un desaroyo fuerte den reservashonnan pa temporada di wenter 2026-2027. Ta efektuá tur buelo ku un Boeing 787 ku lugá pa 305 pasahero, partí den Deluxe, Comfort i Economy. Un parti di e personal di kabina ta proveniente di Kòrsou.
Segun TUI Kòrsou no ta probechá solamente di kapasidat èkstra, pero tin mas espasio den e ret pa destinashonnan manera Aruba, Boneiru i Repúblika Dominikana. E kompania ta mira e demanda haltu konstante komo un konfirmashon di e atrakshon di Kòrsou komo destinashon turístiko.