WILLEMSTAD – Un avion di Spaña ku 353 persona na bordo a desviá antayera nochi pa Kòrsou, despues ku e no por a aterisá na Caracas pa motibu di e daño kousá pa e temblor. Segun informashonnan lokal aeropuerto di Maiquetía a haña daño seriamente.
Venezuela a deklará djarason anochi estado di emergensia despues di dos temblor djis despues di otro. E temblornan tabatin segun servisio meteorológiko di Venezuela un forsa di 7,2 i 7,5. Na diferente sitio a raportá daño pisá, entre otro na edifisionan grandi.
Avionnan no por a aterisá pa motibu di daño na Maiquetia. Despues a desviá e avion di Spaña pa Kòrsou. Outoridatnan na Kòrsou a regla entre otro akohida pa e 353 pasaheronan.
Outoridat di aviashon sivil Colombiano a ofresé ayudo pa yuda garantisá seguridat di tráfiko aéreo di i pa Venezuela. Por redirigí avionnan ku tin Venezuela komo destinashon, tambe pa Barranquilla i Bogotá. Kòrsou tambe ta disponibel komo aeropuerto alternativo.
Por a sinti e temblor na Boneiru i Kòrsou tambe, ounke e shòk a keda limitá einan segun informashonnan. Na Colombia tambe a sinti e temblor.