KRALENDIJK - Bonaire International Airport (BIA) a risibí un biaha mas e sertifikado di seguridat di Inspekshon di Medio Ambiente i Transporte (ILT). E sertifikado a wòrdu otorgá pa un periodo di tres aña i ta konfirmá ku Flamingo Airport ta sigui kumpli ku e rekisitonan legal pa operashonnan sigur di aeropuerto.
E sertifikado di seguridat ta wòrdu emití a base di e ‘Besluit Toezicht Luchtvaart BES’ i ta konfirmá ku e aeropuerto ta kumpli ku e rekisitonan stipulá pa loke ta trata infrastruktura di aeropuerto, prosesonan operashonal, maneho di seguridat, i e ehekushon sigur di operashonnan diario di aeropuerto. Promé ku sertifikashon, ILT a hasi un evaluashon ekstenso di entre otro e sistema di maneho di seguridat, proseduranan operashonal, entrenamentu, métodonan di trabou, i kumplimentu ku lei i regulashonnan aplikabel.
Giordano Molina, Direktor Operashonal di BIA: "Seguridat ta forma e base di tur loke nos ta hasi. E resultado aki ta danki na e kompromiso i profeshonalismo diario di nos empleadonan i e bon koperashon ku nos partnernan na aeropuerto. Den e ultimo añanan, nos a invertí hopi den e profesionalisashon mas aleu di nos organisashon i nos prosesonan di seguridat. E ekstenshon di e sertifikado aki ta un fuerte konfirmashon ku e esfuersonan di nos organisashon ta duna su frutonan i ku nos ta sigui kumpli ku e normanan di seguridat di mas haltu.”
Ku e sertifikado di seguridat renobá, BIA tambe ta disponé di un fundeshi fuerte pa sigui desaroyá un aeropuerto ku ta kla pa enfrentá e futuro. Miéntras ku e aeropuerto lo sigui invertí signifitativo den infrastruktura, inovashon, i e desaroyo di e organisashon den e próksimo añanan, un ambiente seif pa biaheronan, empleadonan, i tur otro usuario di aeropuerto ta keda e punto di salida pa kada desaroyo.