KRALENDIJK – Bishitantenan di Te Amo Beach a keda sorprendé djadumingu 12 di yüli ora un Boeing V-22 Osprey Merikano tabata bula abou riba Boneiru. E avion tiltrotor, ku masha poko sa mira den espasio aéreo riba Boneiru, a hala hopi atenshon. Hopi pòtrèt i video tabata sirkulá di e avion riba media sosial.
Na promé instante no tabatin klaridat kiko e Osprey tabata hasi presis riba Boneiru. Aeropuerto Internashonal di Boneiru (BIA) a bisa na promé instante di no tabata na altura di un aterisahe. Despues a aklará esei. Segun BIA e avion a “hasi solamente un touch-and-go” i no a aterisá di bèrdat.
Defensa tambe a duna diferente splikashon. Un bosero a laga sa inisialmente ku no tabatin aterisahe. Un dia despues a duna splikashon ku mas detaye. “Durante e bahamentu a hasi algun touch and go,” segun e bosero. Un touch and go ta nifiká ku un avion ta aterisá, duna gas direktamente atrobe i bolbe lanta.
Avion Merikano
Un dia promé e mésun bosero a indiká kaba ku ta trata di un avion Merikano. Segun defensa e Osprey ta forma parti di un buelo di entrenamentu ku tabata ehekutando durante buelonan ouksiliar pa Venezuela. “Di e manera aki e tripulashon ta tene su práktika na nivel. E Osprey a sigui e rutanan di kontrol di tráfiko aéreo normal. E tripulantenan ta ehekutá buelonan ouksiliar pa Venezuela, pero mester mantené debesenkuando tambe otro partinan di nan entrenamentu.”
Remarkabel ta e patronchi di buelo di e avion. A base di datonan di buelo disponibel ta parse ku e Osprey a bula di Kòrsou pa Boneiru, kaminda el a bula un rònchi riba Boneiru i a hasi e touch and go. No tin indikashon si e avion a sigui bula pa Venezuela
Pakiko a skohe netamente Boneiru pa hasi e ehersisio aki, no ta konosí. Tampoko no ta kla pakiko a realisá e touch and go na Aeropuerto Internashonal di Boneiru. Echo ta keda ku e aparishon rara di e V-22 Osprey a hala hopi atenshon i a pèrkurá pa un momento spesial di aviashon na Boneiru.