KRALENDIJK- Entrante 8 di yüli 2026, Sra. Miroslava I. Wedervoort a wòrdu nombrá dor di e Reunion General di Akshonista komo miembro di Hunta di Komisario di Bonaire International Airport N.V. (BIA) pa un periodo di tres aña. Ku su nombramentu, e Hunta ta wòrdu ekspandé na kuater miembro, i e ekspertisio komersial i finansiero denter di e órgano di supervishon ta wòrdu fortalesé mas ainda.
E ekspanshon di e Hunta ta aliñá ku e fase ku BIA ta aden aktualmente. Ademas di garantisá seguridat, kontinuidat i operashonnan di aeropuerto konfiabel, BIA lo enfoká eksplísitamente riba e desaroyo mas aleu di e aeropuerto den e próksimo añanan, inkluyendo aktividatnan komersial, desaroyo di ruta, propiedat, konseshonnan i kreashon di balor sostenibel.
Segun BIA, Wedervoort ta poseé mas ku kuarenta aña di eksperensia den e sektor bankario i finansiero, den tantu funshonnan ehekutivo komo supervishonal. Aktualmente e ta Presidente di Fair Trade Authority Curaçao i miembro di Hunta di Supervishon di Banko Sentral di Kòrsou i Sint Maarten. Ademas, ela fungi anteriormente komo Presidente di Kontraloria General di Kòrsou. Su ekspertisio amplio den strategia komersial, asuntunan di invershon, maneho di riesgo i gobernashon ta konstituí un adishon balioso na e komposishon aktual di e Hunta.
"Ku e nombramentu di Sra. Wedervoort, nos ta fortalesé nos Hunta ku un direktor i supervisor sumamente eksperensiá. Su konosementu di gobernashon, asuntunan finansiero, i strategia komersial, kombiná ku su eksperensia amplio denter di e parti Karibense di Reino, ta kuadra perfektamente ku e próksimo fase di desaroyo di Bonaire International Airport. Nos ta spera un kolaborashon ameno i eksitoso”, asina Angel Bermudez, presidente di hunta di komisario di BIA a bisa.