KRALENDIJK - Den fin di siman un grupo di hóben a partisipá ku éxito den e `bootcamp` di perkushon di Gang di Arte. Durante tres dia intensivo, e partisipantenan a sera konosí ku diferente aspekto di perkushon. Nan siña e basenan di perkushon i a profundisá nan konosementu riba strukturanan di ritmo i diferente téknika. E fin di siman a sera ku un presentashon pa famia i amigunan, kaminda e partisipantenan a por a mustra tur loke nan a siña. Segun lider di proyekto Damari Alonzo, e `bootcamp` a forma un promé paso importante den desaroyo di e grupo.
E `bootcamp` a wordu organisá pa ACE Foundation den kolaborashon ku Fundashon Konstrui Awor i Mañan (KAIM), Entidat Pùbliko Boneiru i Divi Flamingo. Bou di guia di Dr. Sandy Hato, ku tin hopi aña di eksperensia i konosementu den mundu di persekushon, e partisipantenan a risibí lèsnan teorétiko i práktiko. Hato a wordu sostené pa coachnan ku tambe ta aktivo den sektor di perkushon i ku a kompartí nan eksperensia i konosementu ku e partisipantenan. “ Mi ta hopi satisfecho kon entusiasmá e mcuhanan tabata. Mayornan keda sostené nan pasombra nan tin hopi smak i tin hopi talento. Na esnan ku a hasi e fin di siman posibel, keda duna boso aporte pasombra e muchanan ke i tin interes’’, asina Sandy Hato a bisa riba e anochi final.
Riba promé dia, e enfoke tabata riba konosementu mutuo i un introdukshon na percushon. Di dos dia, e grupo a traha riba strukturanan di ritmo, aprofundisashon di téknikanan i preparashon pa e presentashon final. E último dia a enfoká riba ripitishon, práktika i e presentashon final.
Lider di proyekto Damari Alonzo: Despues di e `bootcamp`, e grupo lo sigui traha riba desaroyo di nan abilidatnan. “E trabou berdadero ta bai kuminsá awor. E grupo lo enfoká riba perfekshoná loke nan a siña i sigui amplia nan konosementu. Ora nan ta kla pa esaki, lo tin presentashonnan públiko tambe’’. ACE Foundation lo sigui tene komunidat informá tokante futuro aktividatnan i presentashonnan di e grupo.