ORANJESTAD – Departamentu di Kriminalidat Organisá di polis di Aruba a detené djabièrnè shete sospechoso i a interseptá un partido grandi di droga na Rodgers Beach. Ademas a konfiská tambe un outo i dos jetski.
Segun polis a deskubrí djabièrnè atardi vários pakete ku droga na kosta di Rodgers Beach. A detené seis persona inmediatamente: sinku hende hòmber nasé na Aruba i un hende muhé prosedente di Colombia.
E akshon a sigui riba lokual polis a deskribí komo un “bishita relámpago” di e departamentu di Kriminalidat Organisá. Polis ta papia di “un akshon bon organisá” kaminda a duna baho mundu un klap duru di nobo.
E investigashon a sigui djabièrnè anochi ku dos entrada hudisial na mes momento, unu na Seroe Colorado i unu na Appelsinastraat. Na e kas na Appelsinastraat a detené un hòmber tambe sospechá di poseshon i trafikashon di droga.
Djasabra mainta a sigui ku e investigashon kantu di kosta, kaminda a topa di nobo ku paketenan di droga.
Durante e operashon Wardakosta a asistí polis tantu riba laman komo riba tera.