KRALENDIJK – Den anochi di djasabra pa djadumingu polis a konfiská un arma di kandela i munishon despues di un persekushon den e barionan Tera Kòrá i Nikiboko.
Den kareda di 2’or di madrugá un patruya di polis a ordená un shofùr di un outo di famia pa para. Polisnan a mira ku e lusnan di brek no tabata funshoná bon i ku e outo tabata zigzag riba kaminda.
Na promé instante a parse ku e shofùr ta bai para, pero na momento ku e vehíkulo a mengua velosidat, dos okupante a habri un porta i a purba hui. Djis despues e shofùr a kore bai ku velosidat haltu, pa despues polis a kuminsá ku e persekushon.
E persekushon a sigui den diferente kaya i a bin kaba na Kaminda Nieuw Amsterdam, banda di Kaya Konfó. Einan un pasahero a bolbe baha for di e outo i kore bai, mientras e shofùr a sigui ku su huida.
Agentenan a sigui ku e persekushon na pia tras di e pasahero ku a hui. Durante e persekushon aki a lòs tres tiru di atvertensia. E sospechoso sinembargo a sa di probechá di e skuridat i a skapa.
Durante un investigashon ku a sigui den bario polis a topa ku un arma di kandela i munishon. A konfiská ámbos pa sigui ku e investigashon. Despues a haña e outo tambe na Kaminda Djabou. A konfiská e outo tambe pa sigui investigá.
Polis ta sigui investigá identidat i enbolbimentu di e sospechosonan.