KRALENDIJK – Djaweps 2 di yüli 2026, e eksposishon di arte ‘All Minds Matter’ ta habri na Terramar Museum. E eksposishon aki ta un proyekto di kolaborashon ku Mental Health Caribbean (MHC) i ta trese huntu un kolekshon diversifiká di pintura, dibuho, eskultura i obra di ‘mixed-media’ di un grupo di artista.
Na Mental Health Caribbean, arte visual ta forma parti di un enfoke orientá riba rekuperashon kaminda talento, outonomia i kresementu personal ta sentral. E artistanan di ‘All Minds Matter’ ta mustra ku kreatividat no konosé limitashon i ku arte ta duna hende e kapasidat di mustra nan mes, fuera di diagnóstiko òf etikèt.
Ku e eksposishon akí, Mental Health Caribbean i Terramar Museum ke kontribuí na un diálogo sosial mas amplio tokante salú mental. ‘All Minds Matter’ ta invitá bishitante pa no solamente mira e arte, sino tambe pa eksperensiá esaki komo un medio ku por konektá, inspirá i kontribuí na bienestar.
E eksposishon ta suprayá ku kreatividat ta un parti fundamental di e ser humano i ku arte por kontribuí na un sosiedat inklusivo kaminda tin espasio pa e historia di kada persona.
Mental Health Caribbean i Terramar Museum ta invitá bishitante pa aserka e obranan komo kontribushon artístiko independiente i ta stimulá un reflekshon habrí riba kreatividat, persepshon i e diferente manera ku arte por representá eksperensia.
E apertura ta tuma lugá riba 2 di yüli 2026 di 17:00 pa 20:00 or na Terramar Museum na Kralendijk, Kaya Isla Riba 3.
Despues di esei, por mira e exposishon durante un luna.