KRALENDIJK – Gastunan pa pelíkula i serinan di televishon na Boneiru ta inkluí serka Fondo di Sine Hulandes komo gastu di produkshon Hulandes. E mésun kos ta konta tambe pa Saba i Sint Eustatius.
E distinshon ei ta pará den e reglamentunan nobo di Netherlands Film Production Incentive, ku a publiká djarason den Staatscourant. E reglanan ta konta pa pelíkulanan den teatro i pa e asina yamá serinan di high-end drama, documental i animashon.
Den e splikashon tin pará ku tur kaminda ku ta papia di Hulanda den e reglamento, ta konta tambe pa Boneiru, Sint-Eustatius i Saba. Asina por presentá gastunan na profeshonal- i kompanianan di sine riba e tres islanan bou di kondishonnan komo gastunan di produkshon Hulandes.
E supsidio ta destiná pa gastunan di produkshon ku por demostrá ku a traha nan den Karibe Hulandes. E kontribushon ta en prinsipio 35 porshento di e gastunan ku e Fondo di sine a aprobá. Por konsiderá maksimal 80 porshento di e presupuesto total di produkshon komo gastunan di produkshon eligibel.
Evaluashon di petishonnan
E diferensia tambe ta hunga un ròl na momento di evaluá petishonnan. E Fondo di sine ta wak e proporshon entre gastunan Hulandes i e supsidio ku a pidi. Ta yama esaki e efekto multiplikadó. Mas sèn un produkshon gasta den Karibe Hulandes, mas punto e petishon por haña.
Ku sinenan den teatro por gana maksimal binti punto ku e efekto ekonómiko aki. Ora ta trata di seri nos ta papia di djessinku punto. E areglo ta menshoná eksplísitamente ku gastunan hasí na Boneiru, Sint Eustatius i Saba ta inkluí.
Esei ta duna Boneiru un posishon favorabel komo sitio di grabashon. Sèn ku un produktor ta saka riba e isla pa por ehèmpel servisionan lokal, personal i fasilidatnan di sine por fortifiká e petishon di e supsidio, kontal ku e gastunan ta kumpli ku e kondishonnan di e fondo.
Por konsiderá un kompania di produkshon ku ta ubiká na Boneiru tambe básikamente komo un solisitante Hulandes. E kompania mester kumpli si ku e sobra eksigensianan, entre kua kondishonnan di eksperensia, finansiamentu, balor kultural i produkshonnan anterior.
Film Production Incentive ta diseñá pa hasi Hulanda mas atraktivo pa produkshonnan di sine nashonal i internashonal. Ministerio di Enseñansa, Kultura i Siensia ta pone anualmente binti mion euro disponibel pa esaki.