KRALENDIJK — Na Boneiru pronto lo kuminsá den un proyekto piloto kaminda bienestar di hende i bestia lo wordu atendé huntu na nivel di bario. E proyekto ta enfokando riba detekshon tempran di problemanan i ofresimentu di ayudo prátiko na e residentenan.
Norbert Tadema, ku a tuma inisiativa di e proyekto, ta dedikando su mes pa hopi aña pa un mihó bienestar di bestia ta suprayá ku tin un relashon kla entre pobresa i bienestar di bestia. Pa e motibu ei a skohé un punto di salida riba nivel di bario, kaminda problemanan wòrdu atendé mas tantu posibel na nan orígen.
Diputado Timoteo Silberie, ku bienestar di bestia den su portfòlio, a duna pèrmit pa e proyekto piloto. Pa esaki a pone finansiamentu disponibel, pa asina ekiponan di bario visibel por yuda residentenan ku konseho tokante na responsabilidat komo doño di un animal, lei, regla i e importansia di sterilisashon i kastrasshon.
E proyekto piloto ta enfoká tambe riba prevenshon di negligensia i identifikashon di puntonan krítiko den diferente barionan.
Aña di dedikashon
Tadema ta ekspresá su apresio pa e diferente organisashonnan i boluntarionan ku ta dedikando nan mes pa hopi aña kaba na bienestar di bestia na Boneiru. E proyekto piloto ta basá riba e kompromiso eksistente, i mester kondusí na un refuerso struktural na nivel di bario.