KRALENDIJK – E atletanan di Special Olympics Boneiru a presta bunita prestashon durante Special Olympics Nationale Spelen Haarlem 2026 na Hulanda. Ku un kolekshon impreshonante di medayanan di oro, plata i bròns e delegashon ta regresá Boneiru orguyoso despues di un torneo deportivo i inspirativo.
Bocce: oro i plat pa Boneiru
Bocce ta un deporte paralímpiko pa personanan ku un defisiensia motóriko kaminda nan mester purba tira nan balanan blou òf kòrá mas serka posibel di un bala blanku. Pa e parti di bocce pa pareha Selvine Offerman i Marchantelie Anthony a konkistá medaya di oro. Michael Solognier i Su-endry Weef a haña plata.
Landamentu: oro pa Jerome Martis
Den pisina tambe a presta fuerte. Jerome Martis a optené un medaya di oro. E ekipo Boneriano a agregá akinan tambe dos medaya di plata i tres di bròns.
Atletik: dos biaha oro riba 100 i 200 meter
Den atletik Michele Matthew i Lixzandro Mauricio a pèrkurá pa oro riba respektivamente 100 i 200 meter. Roël Scherptong a haña dos biaha bròns, tantu riba 100 komo 200 meter. Shalimar Matthew i Lixzandro Mauricio a finalisá respektivamente na di kuater i di sinku lugá.
Futbòl: bròns pa e tim
E ekipo di futbòl tambe a sa di optené un lugá riba podio i a bolbe ku bròns. E tim tabata konsistí di Joviantly Susanna, Christopher Martha, Robert Statius, K’Shawn Pietersz, Camilo Matthew, Jeadan Thode i Elton Winklaar. Helder Wout tambe ta forma parti di e selekshon, pero no por a biaha na Hulanda pa motibu di malesa.
E delegashon ta yega Aeropuerto Internashonal Flamingo djamars 16 di yüni pa 12.30. Ta invitá famia, amigu-, fanátiko- i otro personanan interesá pa duna e deportistanan un kaluroso bonbiní i selebrá huntu nan prestashonnan.