KRALENDIJK – Despues di añanan sin kompetensianan grandi di bodybuilding Boneiru ta prepará pa un espektákulo deportivo. Djasabra 24 di òktober 2026 den Sala Grandi Jong Bonaire ta tuma lugá e promé edishon di Dutch Caribbean Grand Prix Bonaire, un kompetensia habrí di bodybuilding i fitness pa hende hòmber i hende muhé. E evento ta sigui un siman despues di Atlas Classic Curaçao i mester kontribui na reaktivá e deporte di forsa riba e islanan segun e organisashon.
Segun e organisadó i promotor di bodybuilding Marvin Nagelbloem e inisiativa a nase di e nesesidat pa duna atletanan un tarima di nobo. “E deporte mes no ta morto, pero e evento di kompetensia ta simplemente ménos ku antes,” Nagelbloem ta bisa. “Skolnan di deporte ta yen, pero simplemente no tin kompetensianan kaminda atletanan por kompetí ku otro. Nos ke duna e deporte un bida nobo.”
Di Kòrsou pa Boneiru
Despues di e éksito di Atlas Classic Curaçao e organisashon a disidí pa añadí Boneiru tambe na e sirkuito di kompetensia. Atletanan di Boneiru, Kòrsou i e otro islanan por partisipá na ámbos evento.
“E atletanan ku skor bon na Kòrsou i ke bini Boneiru tambe, ta bonbiní,” Nagelbloem ta bisa. “Pa ganadónan i partisipantenan fuerte nos ke yuda kaminda por ku un kompensashon, di moda ku e públiko por mira e mihó atletanan di region tambe den akshon.”
Pa prinsipiantenan í atletanan ku eksperensia
E kompetensia ta habrí pa diferente kategoria, entre kua bodybuilding, classic physique, men’s physique, bikini i bienestar. Segun Nagelbloen personanan interesá no nesesariamente mester ta dirèkt un kompetidó ku eksperensia. “Serka tur hende esei ta otro,” e ta splika. “Tin ku ta trein añanan largu promé ku nan kompetí, otronan ta deskubrí e deporte mas lat. E kos mas importante ta ku bo ta laga un coach òf un hende ku eksperensia evaluá bo, di moda ku bo sa ku bo ta kla pa subi tarima.
Pa yuda partisipantenan potensial, e tim di Atlas ta biaha den luna di yüli kaba pa Boneiru pa aktividatnan di promoshon i sera konosí ku skolnan di deporte lokal. “Bo mester buska konekshon i no kere ku hendenan ta bini dimes,” Nagelbloem ta bisa. “Nos ta bai e skolnan di deporte, papia ku coach- i deportistanan i orientá kiko ta nan nesesidatnan. Asina bo ta konstruí un komunidat.”
Evaluashon di masa muskular, simetria i presentashon
Durante e kompetensia ta evaluá e partisipantenan riba diferente aspekto. No solamente masa muskular ta hunga un ròl, pero tambe proporshon, simetria, porsentahe di fèt i presentashon riba tarima.
“Bo ta wak e masa, proporshonnan, simetria i kondishon,” segun Nagelbloem. “Banda di esei bo mester por presentá bo mes mas mihó ku ta posibel mediante e posturanan obligatorio. Tur esei ta pertenesé na e deporte.”
Duna bèk na deporte
Pa Nagelbloem e evento tin un nifikashon personal tambe. E promotor ku a nase na Sürnam a kuminsá su karera deportivo na Kòrsou i a gana einan entre otro e kampeonato Kurasoleño na 2003.
“Mi raisnan deportivo ta na Kòrsou,” e ta konta. “Einan mi a kuminsá trein i einan mi a partisipá na mi promé kompetensianan. Awor mi ke hasi algu bèk pa e deporte ku a dunami asina hopi.”
Tur hende ta bonbiní
E organisashon ta enfatisá ku no solamente partisipantenan ta bonbiní, pero públiko tambe. E Gran Prix mester bira un evento pa henter komunidat, di deportistanan fanátiko te bishitantenan kurioso.
“Hóben, hende grandi, prinsipiante òf atleta ku eksperensia: tur hende ta bonbiní,” Nagelbloem ta konkluí. “Ta repartí tur hende den un kategoria ku ta pas ku su desaroyo físiko. Ta bira un anochi kaminda deporte di forsa i fitness na Boneiru ta sentro di atenshon atrobe.”
E Dutch Caribbean Grand Prix Bonaire 2026 ta tuma lugá riba djasabra 24 di òktober den Sala Grandi Jong Bonaire. Por haña mas informashon via Atlas Classic Media i e kanalnan ofisial di medionan sosial di Atlas Classic Curaçao.