KRALENDIJK – For di 25 te ku 28 di yüni, Lac Bay lo bira e sentro di hubentut i deporte. Un festival úniko di deporte akuatiko kaminda mucha nan, atleta di alto nivel, famia, rekreativo i spesialmente amante di deporte den awa ta reuni pa selebrá e forsa di awa, bientu, moveshon i komunidat.
E evento internashonal PWA Youth Event i e nobo festival lokal Pow Wow di Awa ta organisá den kolaborashon ku Indebon, Aquatics Federation Bonaire (AFB), Bonaire Sailing School Association (BSSA), Watersport Bonaire, Windsurf & Wingfoil Association Bonaire (WAB), BYWD Foundation, i varios otro partner lokal.
Mas mucha riba i den awa
Den e último aña i mei, mas i mas mucha boneiriano a bira aktivo den deporte akuatiko. Danki na esfuerso di klubnan, entrenadónan, voluntario nan i organisashonnan di sosten, hopi hobennan ta haña oportunidat pa konosé ku bela, windsurf, landamentu den awa i otro aktividatnan salú pa afó.
Tambe Indebon ta sostené inisiativanan ku ta kontribuí na un desaroyo aktivo, salú i positivo di hóbennan na Boneiru. Pow Wow di Awa ta enkajá perfektamente den e meta aki dor di kombiná deporte, naturalesa i plaser den un solo evento.
Un bahia, un komunidat
E meta di Pow Wow di Awa ta simpel: reuní e komunidat di deporte akuatiko di Boneiru. No solamente pa kompetí, pero prinsipalmente pa krea konekshon entre diferente deporte, edat i nivel.
Bou di e lema "One Tribe. One Bay. One Rhythm.", Lac Bay lo transformá pa kuater dia den un lugá di encuentro kaminda deportividat, aventura, salú i divertimentu ta sentral.
Deporte hubenil internashonal na Boneiru
Pa di tres aña konsekutivo, e PWA Youth Tour ta regresá Boneiru. E biaha aki e ta organisá pa Bonaire Youth Watersport Development Foundation (BYWD Foundation). Talentonan hoben di windsurf for di Kòrsou, Venezuela, Estados Unidos, Hulanda i varios otro pais ta bini Lac Bay pa lucha pa e mihó resultadonan.
Apertura spektakular na Wilhelminaplein
Ademas di e talentonan internashonal, e mihó freestylernan lokal tambe lo tuma akshon. E evento ta kuminsá djasabra anochi di 17:30 te 18:30 ku un spektakular Tow-In Freestyle Show na Wilhelminaplein. Akí, heroenan lokal i partisipantenan internashonal lo mustra nan truconan mas impreshonante.
Ku eventonan manera Regatta, PWA Youth Tour, BonSailing Regatta, Open Kampionato di Landamentu den Awa di Boneiru i Pow Wow di Awa, Boneiru ta konfirmá un biaha mas su posishon komo un di e destinashonnan di deporte akuatiko mas úniko den mundu, i e isla ta sigui krese komo un berdadero nashon di deporte akuatiko.
Quest for the Treasure of Lac Bay
Riba djasabra, e hubentut entre 7 i 14 aña ta sentral. Durante e aventura aki, mucha nan lo bai den ekiponan riba tabla di surf i boto di bela na buska pista, reto i finalmente e tesoro skondí di Lac Bay. Kooperashon, kreatividat, deportividat i aventura ta e elementonan prinsipal.
Open Water Swim – pa tur hende di 9 aña i mas!
Partisipá den e Open Water Swim den e bunitesa di Lac Bay i skohe entre 500 òf 1000 meter den estilo liber i/o pechu, organisá pa Aquatics Federation Bonaire. Mucha di 9 te 12 aña ta landa 500 meter. For di 13 aña para ariba por skohe entre 500 i 1000 meter. Un eksperensia divertido i desafiante kaminda deportividat, plaser i encuentro ta sentral.
Windsurf Akademia di Kiri
E hoben surfernan di Windsurf Akademia di Kiri tambe lo ta presente. For di su start na novèmber 2025, diesnan di mucha a haña nan kaminda pa e akademia. Awor mas ku 30 mucha ta haña les kada siman i interes ta sigui krese. E akademia ta hunga un papel importante den desaroyo di talento hoben di windsurf na Boneiru i ta mustra ku windsurf ta pa tur hende.
Kolaborashon ku MBO Sport & Bewegen
Pow Wow di Awa tambe ta ofresé eksperensia práktiko na estudiante nan di MBO Sport & Bewegen. Nan lo yuda ku organisashon, guia i ehekushon di diferente parti di e evento. Asina e evento ta kontribuí no solamente na desaroyo di deporte, sino tambe na edukashon, desaroyo di talento i kompromiso sosial na Boneiru.
Bin forma parti!
E organisashon ta invitá tur hende pa forma parti di Pow Wow di Awa. Registrá komo partisipante: https://form.jotform.com/261526489697072
Registrá komo voluntario: powwowdiawa@gmail.com
Bin mira i animá e deportistanan. Bishitá e spektakular Tow-In Show djasabra anochi na Wilhelminaplein. Deskubrí kon bunita, salú i aksesibel deporte akuatiko na Boneiru por ta Huntu nos ta.