KRALENDIJK – Djadumingo 28 di yüni 2026 tin un primisia spesial na Sorobon: e promé edishon di Kompetensianan den Laman Ganchu (Open Water Races), organisá pa Federashon Akuátiko Boeniru (Aquatics Federation Bonaire) komo parti di Pow Wow di Awa Watersports Festival. E evento ta ofresé hóben i adulto e chèns pa partisipá na kompetensianan di landamentu den e awa kristalino na Bahia di Lac.
E kompetensianan ta aksesibel pa landadónan tantu rekreativo komo kompetitivo for di 9 aña. Partisipantenan di 13 aña bai ariba por skohe for di distanshanan di 500 òf 1.000 meter den tantu landa estilo liber komo landa estilo eskolar. Pa muchanan di 9 te ku 12 aña tin kompetensianan di 500 meter riba programa. Ku esaki e evento ta ofresé un reto pa landadónan di diferente edat i nivel.
Segun Federashon Akuátiko Boneiru e Kompetensianan den Laman Ganchu ta agregá un ampliashon balioso na e festival. E direktiva ta enfatisá ku e evento ta trese diferente deportenan akuátiko huntu na i rondó di Bahia di Lac i Sorobon, di moda ku e diversidat di Boneiru komo destinashon pa deporte akuátiko ta bira visíbel. Tambe e festival ta brinda un sitio di enkuentro pa deportista, famia- i bishitantenan.
E organisashon ta mira e kompetensianan komo un komplementashon perfekto di mishon di e Pow Wow di Awa Watersports Festival, ku ke uni deporte akuátiko, naturalesa i komunidat ku otro. Bou di e lema “One Tribe. One Bay. One Rhytm.” tresementu huntu di hende ta sentral, no importá edat òf nivel di deporte
E Kompetensianan den Laman Ganchu ta tuma lugá riba djadumingu 28 di yüni entre 8’or i 10’or. Por inskribí pa e evento via e link aki