KRALENDIJK — Pickleball Association Bonaire ta orguyoso di anunsiá ku Team Boneiru lo representá e isla den Pickleball World Cup 2026, ku lo tuma lugá for di 30 di ougùstùs te 6 di sèptèmber na Da Nang, Vietnam. Esaki ta e di dos biaha konsekutivo ku Boneiru ta partisipá den e torneo, despues di un bon prestashon na 2025 kaminda e ekipo a trese un medaya di plata i un medaya di bròns bèk kas.
E delegashon di e aña akí ta konsistí di hungadónan tantu bou di 50 aña komo riba 50 aña, i lo kompetí den vários divishon di e torneo.
E Pickleball World Cup, organisá na kolaborashon ku America & Asia Connect (AAC), ta spera di ta e edishon mas grandi te ku awor, ku mas o menos 80 delegashon i mas ku 4,000 atleta for di henter mundu. Un aumento kompará ku 68 delegashon i mas ku 2,500 atleta na 2025. E wegan lo wòrdu hunga na Tien Son Sport Center i Tuyen Son Sport Complex, ku vários otro lugá satelit rònt di Da Nang.
E torneo tin sinku kategoria: Kids, Juniors, Open, Seniors i Masters. E organisadónan tambe tin plan pa purba stablesé un Guinness World Record durante e evento, kua su tema ta “One World. One Game. One Champion.” (Un Mundu. Un Wega. Un Kampeon.)
E partisipashon di Team Boneiru ta reflehá e kresementu di e komunidat di pickleball na Boneiru, i su ambishon pa sigui riba e bunita prestashon di aña pasá na nivel internashonal.
Pickleball Association Bonaire ta hasi un yamada na negoshinan i organisashonnan lokal pa yuda sponsorá e partisipashon di Team Boneiru den e torneo di e aña akí. Kompanianan interesá pa yuda e ekipo tambe por pidi un dia di team bonding ku pickleball pa nan personal, dor di kontakta e asosiashon.