KRALENDIJK – Un koperashon entre dos empresario ku huntu a kuminsá un studio di yoga na Boneiru, a kaba den un konflikto hurídiko. Korte den promé instansia di Boneiru, Sint Eustatius i Saba a disidí ku un di e èks sosionan mester paga alrededor di USD 3.700 na e otro sosio pa kompra di e inventario i lèsnan di yoga ku no a paga.
E dos empresarionan a kuminsá fin di 2024 huntu ku desaroyo di un studio di yoga. Nan a pensa huntu riba un nòmber i logo, a hür un edifisio i a kumpra huntu material i inventario. Sinembargo na luna di mei 2025 e koperashon a kibra despues di un konflikto.
Despues di a terminá e koperashon un di e sosionan a kontinuá ku e studio di yoga bou di un otro nòmber. Ounke a usa un kara visual nobo i kanalnan online nobo, wes a husga ku en realidat por papia di un kontinuashon di e mésun empresa. E studio a keda na e mésun sitio, tabata hasi uso di e mésun inventario, a keda ku miembronan eksistente i a sigui traha ku e mésun dosentenan di yoga.
Mester paga invershonnan
E èks fundadó a mustra ku el a invertí miles di dòler den ekipá e studio i mester kompensá pa esei. E wes a bai parsialmente di akuerdo ku esei.
Pasobra e empresario ku a kontinuá a sigui usa e inventario, e mester paga e balor di kompra di e ekiponan kompleto. Wes a rechasá un porsentahe di depresiashon di 50 te 75 porshento. Segun Korte a supstansiá insufisientemente pakiko e inventario, ku ta maksimal mei aña bieu, a baha asina tantu den balor.
Tambe wes a konsedé un kompensashon di 520 USD pa lèsnan di yoga ku no a paga e demandante nunka.
A rechasá e kontra demanda
E empresario ku a kontinuá ku e studio a alegá entre otro ku por a deskontá sierto gastu i a trese dilanti den un kontra demanda ku e èks sosio no tin derecho riba pago bèk kompleto di su invershonnan. Wes a rechasá e argumentonan ei, pasobra nan no tabata sufisientemente supstansiá òf no tabatin interes hurídiko independiente.
Na final di kuenta e empresario ku ta kontinuá mester paga USD 3.798,71. Ta kompensá e gastunan di e proseso prinsipal, di moda ku ámbos partido ta karga nan propio gastunan.